Virat Kohli Birthday : وراٹ کوہلی کے 37ویں جنم دن پر بی سی سی آئی اور شائقین نے دی مبارکباد ، ریکارڈ کے ساتھ پیش کی گئی نیک تمنائیں

نئی دہلی، 5 نومبر: ٹیم انڈیا کے سابق کپتان اور دنیا بھر میں “رن مشین” کے نام سے مشہور وراٹ کوہلی نے بدھ کو اپنا 37واں جنم دن منایا۔ اس موقع پر شائقینِ کرکٹ، سابق کھلاڑیوں اور کرکٹ اداروں کی جانب سے مبارکباد دینے کا سلسلہ جاری ہے۔ بھارتی کرکٹ کنٹرول بورڈ (بی سی سی آئی) نے سوشل میڈیا پر کوہلی کے شاندار کیریئر کا جشن مناتے ہوئے ان کے ریکارڈز شیئر کیے اور انہیں نیک تمنائیں پیش کیں۔

بی سی سی آئی نے سوشل میڈیا پلیٹ فارم ایکس پر وراٹ کوہلی کی ایک تصویر شیئر کرتے ہوئے لکھا کہ ’’آئی سی سی ون ڈے ورلڈ کپ 2011، آئی سی سی چیمپئنز ٹرافی 2013 اور 2025 اور آئی سی سی ٹی-20 ورلڈ کپ 2024 کے فاتح، ٹیم انڈیا کے عظیم کھلاڑی اور سابق کپتان وراٹ کوہلی کو جنم دن کی دلی مبارکباد‘‘۔ بورڈ نے ان کے شاندار بین الاقوامی اعداد و شمار بھی جاری کیے: کل میچز: 553، کل رنز: 27,673، اور کل سنچریاں: 82۔

سابق بھارتی بلے باز سریش رائنا نے اپنے ایکس پوسٹ میں لکھا کہ ’’کنگ کوہلی 37 سال کے ہو گئے! بھارتی کرکٹ کے اس عظیم ستارے کے ناقابلِ یقین سفر کا جشن مناتے ہیں۔ دعا ہے کہ آنے والا سال ان کے لیے مزید ریکارڈز، فتوحات اور خوشیاں لے کر آئے‘‘۔ اسی طرح سابق فاسٹ بولر مناف پٹیل نے بھی وراٹ کوہلی کو مبارکباد دیتے ہوئے ان کے ساتھ ایک یادگار تصویر شیئر کی، جو انڈین پریمیئر لیگ (آئی پی ایل) کے سابق سیزن کے دوران لی گئی تھی۔ انہوں نے لکھا کہ ’’وراٹ کوہلی کو جنم دن کی بہت بہت مبارکباد‘‘۔

آئی پی ایل فرنچائز ممبئی انڈینز نے اپنے پیغام میں لکھا کہ ’’رن مشین کو جنم دن کی ڈھیروں نیک تمنائیں‘‘۔ وراٹ کی ٹیم رائل چیلنجرز بنگلورو (آر سی بی) نے بھی ایک خاص پیغام شیئر کرتے ہوئے یاد دلایا کہ ’’اسی دن 2023 میں وراٹ نے سچن تندولکر کے 49 سنچریوں کے عالمی ریکارڈ کی برابری کی تھی‘‘۔

جبکہ چنئی سپر کنگز (سی ایس کے) نے اپنے پوسٹ میں لکھا کہ ’’ایک کرکٹ عہد اور ایک لازوال وراثت—جنم دن مبارک ہو، وراٹ‘‘۔ وراٹ کوہلی کو نہ صرف بھارتی کرکٹ کا چہرہ بلکہ دنیا کے بہترین بلے بازوں میں شمار کیا جاتا ہے اور ان کی محنت، نظم و ضبط اور کھیل کے تئیں لگن نوجوان نسل کے لیے ایک مثال ہے۔

بھارت ایکسپریس اردو