T20 World Cup 2026:پاکستان اور نیوزی لینڈ کا بڑا مقابلہ، بابر اعظم سے امیدیں وابستہ، نیوزی لینڈ کے خلاف ان کا ریکارڈ انتہائی شاندار

نئی دہلی :ٹی20 ورلڈ کپ 2026 کے سپر۔8 مرحلے کا پہلا اہم مقابلہ پاکستان اور نیوزی لینڈ کے درمیان آر پریماداسا اسٹیڈیم میں کھیلا جانا ہے۔ اگرچہ میچ پر بارش کے سائے منڈلا رہے ہیں، قابل ذکر بات یہ ہےکہ مقابلہ منعقد ہونے کی صورت میں شائقین کو ایک سنسنی خیز ٹکر دیکھنے کو مل سکتی ہے۔ اس میچ میں پاکستان کی نظریں خاص طور پر سابق کپتان بابر اعظم کی کارکردگی پر مرکوز ہوں گی۔ بابر اعظم اب تک ٹی20 ورلڈ کپ 2026 میں بڑی اننگز کھیلنے میں کامیاب نہیں ہو سکے، مگر نیوزی لینڈ کے خلاف ان کا ریکارڈ انتہائی شاندار رہا ہے۔ دونوں ٹیموں کے درمیان کھیلے گئے ٹی20 مقابلوں میں وہ سب سے زیادہ رنز بنانے والے بیٹر ہیں۔ بابر نے نیوزی لینڈ کے خلاف 26 میچوں کی 24 اننگز میں 41.90 کی اوسط اور 131.93 کے اسٹرائیک ریٹ سے 880 رنز اسکور کیے ہیں، جن میں ایک سنچری اور آٹھ نصف سنچریاں شامل ہیں۔ ان کا بہترین اسکور ناقابلِ شکست 101 رنز ہے۔

بابر کے علاوہ فخر زمان بھی نیوزی لینڈ کے خلاف اچھا تجربہ رکھتے ہیں۔ انہوں نے 17 میچوں میں 439 رنز بنائے ہیں اور ان کا اسٹرائیک ریٹ 134 سے زائد رہا ہے، تاہم موجودہ ورلڈ کپ میں انہیں پلیئنگ الیون میں مستقل موقع نہیں مل سکا۔

کیوی بلے باز پاکستان کے لیے بڑا چیلنج

پاکستانی ٹیم کو نیوزی لینڈ کے چند خطرناک بلے بازوں سے خاص طور پر محتاط رہنا ہوگا، جنہوں نے ماضی میں پاکستان کے خلاف نمایاں کارکردگی دکھائی ہے۔ مارک چیپ مین پاکستان کے خلاف 25 اننگز میں 663 رنز بنا چکے ہیں، جن میں ایک سنچری اور چار نصف سنچریاں شامل ہیں، جب کہ ان کا اسٹرائیک ریٹ 161 سے زائد ہے۔

اس کے علاوہ اوپنرز ٹم سیفرٹ اور فن ایلن بھی پاکستانی باؤلرز کے لیے بڑا خطرہ ثابت ہو سکتے ہیں۔ ٹم سیفرٹ نے پاکستان کے خلاف 579 رنز تیز رفتار انداز میں بنائے ہیں، جبکہ فن ایلن 190 سے زائد اسٹرائیک ریٹ کے ساتھ جارحانہ بیٹنگ کے لیے مشہور ہیں اور 137 رنز کی بڑی اننگ بھی کھیل چکے ہیں۔ قابل ذکر بات یہ ہےکہ گلین فلپس اور ڈیرل مچل کی کارکردگی بھی پاکستان کے خلاف مؤثر رہی ہے، جس کے باعث سپر۔8 کا یہ مقابلہ دونوں ٹیموں کے لیے نہایت اہم اور سخت امتحان ثابت ہو سکتا ہے۔

بھارت ایکسپریس اردو