Australia Tour of Pakistan: پاکستان کے دورے پر آئے گی آسٹریلیا کی ٹیم، تین ون ڈے  میچوں کی سیریز کا شیڈول جاری، آئی پی ایل 2026 پلے آف شیڈول سے ٹکراؤ کا امکان

نئی دہلی:  آسٹریلیا کرکٹ ٹیم تین ون ڈے میچوں کی سیریز کے لیے 23 مئی کو پاکستان پہنچے گی۔ پاکستان کرکٹ بورڈ (پی سی بی) نے جمعرات کو اس دورے کی باضابطہ تصدیق کردی۔ پی سی بی کے مطابق آسٹریلوی ٹیم 23 مئی کو اسلام آباد پہنچے گی۔ ون ڈے سیریز کا پہلا مقابلہ 30 مئی کو راولپنڈی کرکٹ اسٹیڈیم میں کھیلا جائے گا، جبکہ دوسرا اور تیسرا میچ بالترتیب 2 اور 4 جون کو لاہور کے قذافی اسٹیڈیم میں ہوگا۔ تینوں میچ مقامی وقت کے مطابق شام 4:30 بجے شروع ہوں گے، جبکہ ٹاس شام 4 بجے کیا جائے گا۔

آئی پی ایل پلے آف شیڈول سے ٹکراؤ کا امکان

پاکستان اور آسٹریلیا کے درمیان یہ ون ڈے سیریز آئی پی ایل 2026 کے پلے آف مرحلے سے ٹکرائے گی۔ اس وقت کئی آسٹریلوی اسٹار کھلاڑی آئی پی ایل میں مختلف فرنچائزز کی نمائندگی کررہے ہیں، جس کے باعث امکان ہے کہ مکمل طاقتور اسکواڈ پاکستان نہ آئے۔ رپورٹ کے مطابق جن کھلاڑیوں کی فرنچائزز پلے آف میں جگہ نہیں بنا پائیں گی، وہ پہلے ون ڈے سے قبل قومی ٹیم سے جڑسکتے ہیں۔ ان میں ایل ایس جی کے مچل مارش، جوش انگلس اور کے کے آر کے کیمرون گرین شامل ہوسکتے ہیں۔

سینئر کھلاڑیوں کو آرام دیے جانے کا امکان

پیٹ کمنس، جوش ہیزل ووڈ، مچل اسٹارک اور ٹریوس ہیڈ جیسے اہم کھلاڑیوں کو اگست میں بنگلہ دیش کے خلاف ٹیسٹ سیریز کی تیاری کے پیش نظر آرام دیا جاسکتا ہے۔ دوسری جانب کوپر کونولی، زیویئر بارٹلیٹ، بین ڈوارشویس اور میتھیو شارٹ جیسے کھلاڑیوں کو جون میں بنگلہ دیش کے خلاف وائٹ بال سیریز سے قبل بریک دیے جانے کا امکان ہے۔ ایلکس کیری، ایڈم زمپا اور مارنس لبوشین، جو حال ہی میں پاکستان سپر لیگ میں کھیل چکے ہیں، پاکستان کے خلاف ون ڈے سیریز کے لیے آسٹریلوی ٹیم کا حصہ بن سکتے ہیں۔ ناتھن ایلس اور میتھیو رینشا کے بھی اسکواڈ میں شامل ہونے کی امید ہے۔

پاکستان کے خلاف آسٹریلیا کا ریکارڈ

مارچ-اپریل 2022 کے بعد یہ آسٹریلیا کا پہلا ون ڈے دورۂ پاکستان ہوگا۔ اس سے قبل ہونے والی تین میچوں کی سیریز میں پاکستان نے آسٹریلیا کو 2-1 سے شکست دی تھی۔ اسی سال کے آغاز میں پاکستان نے تین ٹی20 میچوں کی سیریز میں آسٹریلیا کو 0-3 سے کلین سوئپ بھی کیا تھا۔ دونوں ٹیموں کے درمیان اب تک مجموعی طور پر 111 ون ڈے میچ کھیلے جاچکے ہیں، جن میں آسٹریلیا نے 71 جبکہ پاکستان نے 36 میچ جیتے ہیں۔ ایک میچ ٹائی رہا جبکہ تین مقابلے بے نتیجہ ختم ہوئے۔

بھارت ایکسپریس اردو۔