WTC Final: ایڈن مارکرم نے ورلڈ ٹیسٹ چیمپئن شپ کے فائنل میں رقم کردی تاریخ، کئی ریکارڈ  کئےاپنے نام

جنوبی افریقہ کے ڈیشنگ بلے باز ایڈن مارکرم نے لارڈز کے تاریخی گراؤنڈ پر آسٹریلیا کے خلاف کھیلے جا رہے ڈبلیو ٹی سی فائنل میں سنچری بنا کر نہ صرف اپنی ٹیم کو چیمپئن بننے کی دہلیز پر پہنچا دیا ہے، بلکہ کئی ریکارڈ بھی اپنے نام کر لیے ہیں۔

ایڈن مارکرم نے سنچری بنائی

ایڈن مارکرم نے اپنے ٹیسٹ کیریئر کی آٹھویں سنچری اسکور کی ہے۔ وہ 159 گیندوں پر 102 رنز بنا کر ناٹ آؤٹ رہے۔ مارکرم ڈبلیو ٹی سی فائنل میں سنچری بنانے والے جنوبی افریقہ کے پہلے بلے باز ہیں۔

مارکرم تیسرے بلے باز بن گئے

ایڈن مارکرم آسٹریلیا کے خلاف کسی بھی آئی سی سی ٹائٹل کے فائنل میں سنچری بنانے والے تیسرے بلے باز ہیں۔ اس سے قبل ویسٹ انڈیز کے کلائیو لائیڈ نے ون ڈے ورلڈ کپ 1975 کے فائنل میں سنچری بنائی تھی اور سری لنکا کے اروند ڈی سلوا نے 1996 کے ون ڈے ورلڈ کپ کے فائنل میں سنچری اسکور کی تھی۔ اس کے ساتھ ہی وہ آئی سی سی ٹائٹل فائنل میں ہدف کا تعاقب کرتے ہوئے سنچری بنانے والے پانچویں بلے باز بن گئے ہیں۔

ایڈن مارکرم کی ناقابل شکست سنچری کی بدولت جنوبی افریقہ تاریخ بنانے کی راہ پر گامزن ہے۔ جنوبی افریقہ کو ہفتہ کو آسٹریلیا کے خلاف جیت اور ورلڈ ٹیسٹ چیمپئن شپ 2025 کا ٹائٹل جیتنے کے لیے صرف 69 رنز درکار ہیں۔ ٹیم کا اسکور دو وکٹوں پر 213 رنز ہے۔ مارکرم 102 اور ٹیمبا بووما 65 رنز بنا کر ناٹ آؤٹ ہیں۔ دونوں کے درمیان 143 رنز کی شراکت ہوئی ہے۔
آسٹریلیا نے پہلے بیٹنگ کرتے ہوئے

آسٹریلیا نے پہلے بیٹنگ کرتے ہوئے 212 رنز بنائے۔ا سٹیو سمتھ نے 66 اور بیو ویبسٹر نے 72 رنز بنائے۔ جنوبی افریقہ کی جانب سے کگیسو ربادا نے پانچ وکٹیں حاصل کیں۔ جنوبی افریقہ کی ٹیم 138 رنز پر آل آؤٹ ہو گئی اور پہلی اننگز کی بنیاد پر آسٹریلیا سے 74 رنز سے پیچھے رہ گئی۔ پیٹ کمنز نے 6 وکٹیں حاصل کیں۔

آسٹریلیا کی دوسری اننگز میں ایک موقع پر 66 رنز پر 6 وکٹیں گر چکی تھیں، قابل  ذکر بات یہ ہے کہ  ایلکس کیری کے 43 اور مچل اسٹارک کے 58 رنز کی بدولت اس کی اننگز 207 تک پہنچ گئی۔ربادا نے چار وکٹیں حاصل کیں۔ جنوبی افریقہ کو جیت کے لیے 282 رنز کا ہدف ملا۔

بھارت ایکسپریس اردو