Lok Sabha Election 2024: ‘انڈیا’ اتحاد کی جیت کی امید میں پوسٹ آفس میں کھاتہ کھولنے والی خواتین کی تعداد میں زبردست اضافہ، کانگریس نے ہر مہینے 8,500 روپے جمع کرانے کا کیا ہے وعدہ

بنگلورو: کرناٹک کی راجدھانی بنگلورو میں عام طور پر خالی جنرل پوسٹ آفس (جی پی او) میں ‘انڈیا پوسٹ پیمنٹ بینک’ اکاؤنٹ کھولنے کے لیے خواتین کی بے مثال تعداد دیکھی جا رہی ہے۔ کھاتہ کھولنے کے لیے پوسٹ آفس آنے والی خواتین کو امید ہے کہ اگر لوک سبھا انتخابات میں جیت کے بعد مرکز میں ‘انڈیا’ اتحاد کی حکومت بنتی ہے تو ان کے کھاتوں میں ماہانہ 8500 روپے جمع ہوں گے۔

  ملک میں لوک سبھا انتخابات ابھی جاری ہیں، لیکن خواتین پوسٹ آفس میں کھاتہ کھولنے کے لیے لمبی قطاروں میں کھڑی ہیں۔ ان میں سے زیادہ تر خواتین کا تعلق اقلیتی برادری سے ہے۔  ان میں سے کچھ خواتین کا خیال ہے کہ “انڈیا پوسٹ پیمنٹ بینک” (IPPB) اکاؤنٹ کھولنے سے، انہیں ہر ماہ 8,500 روپے ملنے کی گارنٹی دی جائے گی۔

پوسٹ آفس میں کھاتہ کھولنے کے لیے آئی ایک خاتون نے بتایا کہ وہ صبح سویرے ہی قطار میں کھڑی تھی۔ ایک اور خاتون نے بتایا کہ ان کے علاقے میں ہر کوئی کہہ رہا ہے کہ جس دن سے اکاؤنٹ کھلے گا اس دن سے پیسے آنا شروع ہو جائیں گے، اس لیے وہ بھی اکاؤنٹ کھولنے آئی ہیں۔

 بنگلور کے چیف پوسٹ ماسٹر ایچ ایم منجیش نے نامہ نگاروں کو بتایا کہ لوگ اس یقین کے ساتھ کھاتہ کھولنے کے لیے پوسٹ آفس آ رہے ہیں کہ محکمہ ڈاک ان کے کھاتوں میں 2,000 یا 8,500 روپے جمع کرے گا۔

منجیش نے کہا، ’’دراصل یہ افواہ ہے۔ یہ افواہ کسی نے پھیلائی ہے۔ محکمہ ڈاک انہیں کوئی رقم نہیں دے گا۔ حالانکہ، اس اکاؤنٹ کو کسی بھی قسم کی آن لائن لین دین یا براہ راست فائدہ (منتقلی) اسکیم کے لیے استعمال کیا جا سکتا ہے۔ انہوں نے کہا کہ محکمہ ڈاک نے اس بارے میں صارفین کو پہلے ہی آگاہ کر دیا ہے۔

ان کا کہنا تھا کہ اتنی بھیڑ تھی کہ جی پی او کی عمارت کے باہر کھلے آسمان تلے مزید کاؤنٹر کھولے گئے تھے۔

  محکمہ ڈاک کے ذرائع کے مطابق یہ بھیڑ گزشتہ تین دنوں سے دیکھی جا رہی ہے۔ مانا جا رہا ہے کہ کانگریس کے کچھ ایم ایل اے نے یہ افواہ پھیلائی ہے، جن پر یقین کرتے ہوئے خواتین جی پی او آ رہی ہیں۔

کانگریس نے وعدہ کیا ہے کہ اگر وہ مرکز میں اقتدار میں آتی ہے تو مہالکشمی یوجنا شروع کرے گی، جس کے تحت غربت کی لکیر سے نیچے (بی پی ایل) زمرہ کے خاندانوں کی خواتین سربراہوں کے کھاتوں میں 8,500 روپے سیدھے جمع کیے جائیں گے۔

بھارت ایکسپریس۔