Seven Die in Andhra Pradesh: آندھرا پردیش میں دو الگ الگ واقعات میں سات افراد ہلاک، پراکاشم ضلع میں باپ نے اپنی تین بیٹیوں کو اس طرح اتارا موت کے گھاٹ

امراوتی: آندھرا پردیش میں دو مختلف واقعات میں دو خاندانوں کے سات افراد، جن میں پانچ کم عمر بچے بھی شامل ہیں، ہلاک ہو گئے۔ پولیس کے مطابق دونوں واقعات کی بنیادی وجہ گھریلو مسائل بتائی جا رہی ہے۔

پراکاشم ضلع کے چیمکورتھی منڈل کے اگرہارم گاؤں میں ایک شخص نے اپنی تین کم عمر بیٹیوں کو زہر دے کر ہلاک کرنے کے بعد خود کشی کرلی۔ پینتیس سالہ ایکولا سدھاکر اپنی بیوی کے میکے سے واپس نہ آنے پر شدید ذہنی دباؤ میں تھا۔ اس نے اپنی بیٹیوں گوچیتا (13 سال)، پوجیتا (11 سال) اور لوکیتا (8 سال) کو کھانے میں زہر ملا کر دیا، جس سے ان کی موت ہو گئی۔ اس کے بعد وہ گاؤں کے مضافات میں واقع ایک کھیت میں گیا، جہاں اس کی لاش ملی۔ پولیس نے تمام لاشوں کو پوسٹ مارٹم کے لیے اسپتال منتقل کر دیا ہے۔ ایک پولیس افسر کے مطابق مقدمہ درج کرکے تفتیش شروع کر دی گئی ہے۔

سری کاکولم ضلع میں خاتون اور دو بچوں کی موت

دوسرا واقعہ سری کاکولم ضلع میں پیش آیا، جہاں ایک خاتون اور اس کے دو بچوں کی لاشیں پالاسا اور تالابدرا کے درمیان ریلوے پٹری کے قریب ملیں۔ مہلوکہ کی شناخت 28 سالہ پوجا کے طور پر ہوئی ہے، جبکہ اس کے بچوں میں پانچ سالہ بیٹا کشانت اور تین سالہ بیٹی دیکشیتا شامل ہیں۔ مقامی افراد نے واقعے کی اطلاع ریلوے پولیس کو دی۔ پولیس نے لاشوں کو اپنی تحویل میں لے کر پوسٹ مارٹم کے لیے اسپتال منتقل کیا اور تحقیقات شروع کر دی ہیں۔

گھریلو تنازعات کا شبہ

ابتدائی تحقیقات سے معلوم ہوا ہے کہ پوجا کے اپنے شوہر کے ساتھ اختلافات تھے۔ پولیس کا ماننا ہے کہ گھریلو مسائل کے باعث یہ افسوسناک واقعہ پیش آیا۔ پوجا سری کاکولم کے بھاونپاڈو علاقے کی رہائشی تھی۔ اس کی شادی آٹھ سال قبل اسی ضلع کے چلامیاپیٹا کے وینکٹیا سے ہوئی تھی۔

وجے واڑہ میں مقیم تھا خاندان

یہ خاندان وجے واڑہ میں رہ رہا تھا اور گرمیوں کی تعطیلات کے دوران چلامیاپیٹا آیا ہوا تھا۔ بتایا جاتا ہے کہ پوجا جمعرات کی صبح اپنے بچوں کے ساتھ گھر سے نکلی تھی اور رات پالاسا ریلوے اسٹیشن پر گزاری تھی۔ پولیس کے مطابق بعد میں وہ بچوں کے ساتھ ریلوے پٹری کے قریب گئی، جہاں تینوں کی موت واقع ہوئی۔

سسرالی افراد پر ہراسانی کا الزام

پوجا کی ماں نے الزام عائد کیا ہے کہ سسرال والوں کی جانب سے مسلسل ہراسانی اور دباؤ کے باعث اس کی بیٹی نے یہ انتہائی قدم اٹھایا۔ پولیس تمام پہلوؤں سے معاملے کی جانچ کر رہی ہے۔

بھارت ایکسپریس۔