Supervisor kidnaps pet dog: ممبئی میں عجیب و غریب واقعہ… سیلری کٹوتی کا بدلہ لینے کیلئے سپروائزر نے پالتو کتے کو کیا اغوا…اور پھر…

ممبئی: ممبئی کے جوہو علاقے سے ایک چونکا دینے والا واقعہ سامنے آیا ہے، جہاں سیکورٹی سپروائزر راجیندر پنڈھارکر نے اپنے مالک سے سیلری کٹوتی کا بدلہ لینے کے لیے 14 سال کے پالتو کتے پریکسی کو اغوا کر لیا۔ پریکسی پومرینین نسل کا ہے۔ وہ جوہو کی ایک عمارت میں رہنے والی ادیتی جوشی کی فیملی کا ایک پیارا رکن ہے۔ جوہو پولیس نے مقدمہ درج کر کے ملزم کی تلاش شروع کر دی ہے جو فی الحال مفرور ہے۔

پولیس کے مطابق 30 سالہ پنڈھارکر ایک نجی سیکورٹی ایجنسی میں سپروائزر تھا اور اس کی ماہانہ تنخواہ 25 ہزار روپے تھی۔ پچھلے مہینے ٹھیکیدار کے ساتھ جھگڑے کے بعد اس کی تنخواہ سے 4000 روپے کاٹ لیے گئے تھے۔ ناراض پنڈھارکر نے کئی بار ٹھیکیدار سے بات کی، لیکن جب بات نہ بنی، تو اس نے پریکسی کو اغوا کرنے کی سازش رچی۔

یہ واقعہ 15 اپریل کی صبح 8 بجے پیش آیا۔ جوشی فیملی نے ہمیشہ کی طرح چہل قدمی کے لیے پریکسی کو سیکورٹی گارڈ کے حوالے کیا تھا۔ پنڈھارکر ایک ماہ کی غیر حاضری کے بعد آٹھ دن پہلے ہی کام پر واپس آیا تھا۔ اس کے بعد وہ پریکسی کو لے کر فرار ہو گیا۔ عمارت کے سی سی ٹی وی فوٹیج میں اسے کتے کے ساتھ آٹو رکشا میں سوار ہوتے اور پھر اندھیری اسٹیشن سے ٹرین میں سوار ہوتے دکھایا گیا ہے۔

ادیتی جوشی نے کہا، ’’پریکسی 14 سالوں سے ہماری فیملی کا حصہ ہے، وہ ہمارے لیے صرف ایک پالتو جانور نہیں ہے، بلکہ فیملی کا ایک رکن ہے۔‘‘

اہل خانہ نے پنڈھارکر سے رابطہ کرنے کی کوشش کی، لیکن اس کا فون بند تھا۔ آس پاس کے علاقوں میں تلاش کرنے کے باوجود پریکسی کا پتہ نہیں چلا۔ پنڈھارکر نے ایک دوسرے سیکورٹی گارڈ کو پیغام بھیج کر کہا کہ اس نے پریکسی کو اغوا کیا ہے اور 25,000 روپے وصول کرنے کے بعد ہی اسے چھوڑے گا۔

جوہو پولیس نے پنڈھارکر کے خلاف بی این ایس ایکٹ کی دفعہ 316(2) کے تحت مقدمہ درج کیا ہے۔ پولیس نے ریلوے پولیس کے ساتھ مل کر اس کی تلاش تیز کردی ہے۔ سی سی ٹی وی فوٹیج کی بنیاد پر پولیس کو شبہ ہے کہ وہ ممبئی سے باہر فرار ہو گیا ہو۔ پولیس نے کہا کہ وہ جلد ہی ملزم کو پکڑ کر پریکسی کو بحفاظت واپس لانے کی کوشش کر رہی ہے۔

بھارت ایکسپریس۔