Modi Government 12 Years: مودی حکومت کے 12 سال: بی جے پی کا میگا جشن کا منصوبہ تیار، 5 جون سے 21 جون تک ملک بھر میں پروگرام

نئی دہلی: وزیر اعظم نریندر مودی کی قیادت والی مرکزی حکومت کے 12 سال مکمل ہونے پر بھارتیہ جنتا پارٹی (بی جے پی) نے ملک بھر میں بڑے پیمانے پر تقریبات اور عوامی رابطہ مہم چلانے کا اعلان کیا ہے۔ پارٹی 5 جون سے 21 جون 2026 تک مختلف پروگراموں کے ذریعے حکومت کی کارکردگی، ترقیاتی منصوبوں اور عوامی فلاحی اقدامات کو عوام تک پہنچائے گی۔ اس سلسلے میں ’’بارہ سال اعتماد کے، ترقی کے، عوامی فلاح کے‘‘ کے عنوان سے خصوصی مہم کا آغاز کیا جا رہا ہے۔ واضح رہے کہ 26 مئی 2014 کو نریندر مودی نے پہلی بار بھارت کے وزیر اعظم کے طور پر حلف لیا تھا۔ 26 مئی 2026 کو ان کی حکومت نے مسلسل 12 سال مکمل کر لیے ہیں۔ اس موقع پر بی جے پی نے حکومت کی کامیابیوں کو اجاگر کرنے کے لیے ایک جامع پروگرام ترتیب دیا ہے، جس میں ملک کے مختلف حصوں میں عوامی رابطے، خدمت خلق، بیداری مہمات اور ترقیاتی سرگرمیوں کا انعقاد کیا جائے گا۔

پارٹی ذرائع کے مطابق حکومت کی 12 سالہ کارکردگی پر مبنی پانچ خصوصی کتابچے بھی جاری کیے جائیں گے۔ ان کتابچوں میں مختلف شعبوں میں حکومت کی کامیابیوں، فلاحی اسکیموں، بنیادی ڈھانچے کی ترقی، معیشت، خواتین کے بااختیار بنانے، کسانوں کی فلاح اور سماجی بہبود کے اقدامات کا تفصیلی جائزہ پیش کیا جائے گا۔ بی جے پی کا کہنا ہے کہ گزشتہ 12 برسوں میں حکومت نے غریبوں، محروم طبقات، کسانوں، خواتین اور پسماندہ طبقوں کی ترقی کے لیے متعدد تاریخی اقدامات کیے ہیں۔ پارٹی اسی پیغام کو عوام تک پہنچانے کے لیے مختلف پروگرام منعقد کرے گی تاکہ عوام کو حکومتی منصوبوں اور ان کے فوائد سے آگاہ کیا جا سکے۔

8 سے 12 جون کے درمیان ملک بھر میں میڈیا مکالموں اور پریس کانفرنسوں کا انعقاد کیا جائے گا۔ ان پروگراموں میں مرکزی وزراء، مختلف ریاستوں کے وزرائے اعلیٰ اور پارٹی کے سینئر رہنما شرکت کریں گے اور حکومت کی 12 سالہ کارکردگی پر روشنی ڈالیں گے۔ اسی دوران مذکورہ خصوصی کتابچوں کی رونمائی بھی کی جائے گی۔ بی جے پی نے 8 سے 14 جون تک خصوصی عوامی رابطہ مہم چلانے کا فیصلہ کیا ہے۔ اس دوران منتخب عوامی نمائندے اپنے حلقوں میں جا کر شہریوں سے ملاقات کریں گے اور ترقیاتی منصوبوں کے بارے میں معلومات فراہم کریں گے۔ اس مہم کے تحت شجرکاری، صفائی مہم، ’’پرگتی پتھ یاترا‘‘ اور ’’وکست بھارت سنکلپ سمیلن‘‘ جیسے پروگرام بھی منعقد کیے جائیں گے۔ پارٹی نے ہر ضلع میں کم از کم 500 اہم شخصیات سے رابطہ کرنے کا ہدف مقرر کیا ہے۔

اسی طرح 12 سے 20 جون کے درمیان ملک بھر میں عوامی فلاحی کیمپ لگائے جائیں گے، جہاں مختلف سرکاری اسکیموں سے متعلق رجسٹریشن کی سہولت فراہم کی جائے گی۔ ان میں آیوشمان بھارت، پی ایم سواندھی، پی ایم سوریہ گھر اور دیگر مرکزی فلاحی منصوبے شامل ہیں۔ پارٹی تنظیموں کو ہدایت دی گئی ہے کہ وہ مستحق افراد کو ان کیمپوں تک پہنچانے میں فعال کردار ادا کریں۔ ماحولیاتی تحفظ کے فروغ کے لیے 5 جون کو عالمی یوم ماحولیات کے موقع پر ’’ایک پیڑ ماں کے نام‘‘ مہم چلائی جائے گی، جبکہ 21 جون کو بین الاقوامی یومِ یوگا کے موقع پر ملک بھر میں منڈل سطح پر یوگا پروگرام منعقد کیے جائیں گے۔ بی جے پی کے مطابق ان سرگرمیوں کا مقصد حکومت کی عوامی خدمات اور ترقیاتی وژن کو گھر گھر تک پہنچانا ہے۔

بھارت ایکسپریس اردو۔