Massive fire breaks out in Ajmer: اجمیر کے ڈگی بازار میں واقع ایک ہوٹل میں زبردست آگ، 4 لوگوں کی موت، 5 لوگ زیر علاج

اجمیر: راجستھان کے اجمیر میں واقع ایک ہوٹل میں آگ لگنے کا واقعہ سامنے آیا ہے۔ آگ لگنے کے بعد یہاں چار لوگوں کی موت ہو گئی۔ وہیں 5 لوگ زیر علاج ہیں۔

معاملہ ڈگی بازار کے ناز ہوٹل سے متعلق ہے۔ بتایا جا رہا ہے کہ ناز ہوٹل میں جمعرات کی صبح تقریباً 8 بجے اچانک آگ لگ گئی۔ واقعہ کے وقت مسافر ہوٹل میں مقیم تھے۔ آگ لگنے کی اطلاع ملتے ہی ہوٹل میں کہرام مچ گیا اور وہاں موجود لوگوں نے گھبراہٹ میں کھڑکیوں سے چھلانگیں لگا دیں۔ حالانکہ، کچھ لوگ آگ کی زد میں آ کر جھلس گئے۔

جائے وقوعہ پر پہنچی فائر بریگیڈ کی ٹیم نے ہوٹل کے اندر پھنسے لوگوں کو نکالنے کے لیے ریسکیو آپریشن شروع کر دیا۔ انہوں نے زخمیوں کو فوری طور پر جواہر لال نہرو اسپتال میں داخل کرایا، جن میں سے 4 لوگوں کی موت ہوگئی، جب کہ 5 افراد اسپتال میں زیر علاج ہیں۔

عینی شاہدین کے مطابق آگ لگنے کی وجہ شارٹ سرکٹ بتائی جاتی ہے۔ ہوٹل چونکہ ایک تنگ گلی میں واقع تھا اس لیے فائر بریگیڈ کو آگ بجھانے میں کافی دشواری کا سامنا کرنا پڑا۔

اجمیر کے ضلع کلکٹر لوک بندھو نے میڈیا سے بات کرتے ہوئے کہا کہ آگ لگنے کی اطلاع ملتے ہی فائر بریگیڈ کی ٹیم موقع پر پہنچی اور کافی محنت کے بعد آگ پر قابو پالیا گیا۔ اس کے علاوہ تین لاشیں اسپتال لائی گئیں۔ باقی زخمیوں کا علاج جاری ہے۔

ان کا مزید کہنا تھا کہ موقع پر موجود ہماری ٹیمیں امدادی کاموں میں مصروف ہیں۔ اس کے علاوہ واقعے کی وجوہات کی بھی تحقیقات کی جارہی ہیں۔

وہیں، ایڈیشنل سپرنٹنڈنٹ آف پولیس ہمانشو جانگڈ پولیس فورس کے ساتھ موقع پر موجود ہیں اور امدادی کام شروع کر دیا گیا ہے۔ یہ بھی معلوم ہوا ہے کہ ریسکیو آپریشن کے دوران فائر بریگیڈ اور پولیس کے کچھ اہلکاروں کی طبیعت بھی خراب ہوگئی۔

بھارت ایکسپریس۔