Bihar News: بہار میں آسمانی بجلی گرنے سے آٹھ افراد کی موت، معاوضے کا کیا گیا اعلان، سی ایم نتیش نے کیا افسوس کا اظہار

پٹنہ: بہار کے چھ اضلاع میں آسمانی بجلی گرنے سے کم از کم آٹھ لوگوں کی موت ہو گئی ہے۔ ایک اہلکار نے بدھ کے روز یہ جانکاری دی۔ عہدیدار نے بتایا کہ پچھلے 24 گھنٹوں میں یہ اموات بھاگلپور، مونگیر، جموئی، مشرقی چمپارن، مغربی چمپارن اور ارریہ اضلاع میں ہوئی ہیں۔

بہار کے وزیر اعلی نتیش کمار نے گزشتہ 24 گھنٹوں کے دوران ریاست میں آسمانی بجلی گرنے سے ہونے والی اموات پر گہرے رنج و غم کا اظہار کیا ہے۔ چیف منسٹر آفس (سی ایم او) کے مطابق ہر مرنے والے کے لواحقین کے لیے 4 لاکھ روپے کی ایکس گریشیا رقم کا بھی اعلان کیا گیا ہے۔

سی ایم او کے بیان کے مطابق، بھاگلپور اور مونگیر اضلاع میں دو دو موت کی اطلاع ملی، اس کے بعد جموئی، مشرقی چمپارن، مغربی چمپارن اور ارریہ اضلاع میں ایک ایک موت ہوئی۔

بیان میں وزیراعلیٰ نے عوام سے بھی اپیل کی کہ وہ خراب موسم کے دوران احتیاط برتیں اور ڈیزاسٹر مینجمنٹ ڈیپارٹمنٹ کی جانب سے جاری کردہ ہدایات پر عمل کریں۔ انہوں نے کہا، ’’خراب موسم کے دوران گھر کے اندر رہیں اور محفوظ رہیں۔‘‘