Delhi Liquor Scam: شراب گھپلا کیس میں ویڈیو کانفرنسنگ کے ذریعے منیش سسودیا کی پیشی

دہلی ایکسائز پالیسی میں مبینہ گھپلے سے متعلق کیس میں آج عام آدمی پارٹی لیڈر منیش سسودیا کی پیشی ہوئی۔ سسودیا کو راؤس ایونیو کورٹ کے لاک اپ سے ویڈیو کانفرنسنگ کے ذریعے جج کے سامنے پیش کیا گیا۔ عدالت نے سی بی آئی کو چارج شیٹ کی کاپی اور متعلقہ دستاویزات کی کاپی ملزمین کو دینے کی ہدایت دی۔ دہلی ایکسائز پالیسی کیس کی اگلی سماعت 6 جون کو ہوگی۔

وہیں کیس کے دوسرے ملزم ارجن پانڈے نے آج عدالت میں حاضر ہونے سے استثنیٰ مانگا۔ پانڈے نے کہا، وہ عدالت میں حاضر نہیں ہو سکیں گے کیونکہ وہ دہلی سے باہر ہیں۔ سی بی آئی نے سپلیمنٹری چارج شیٹ میں دہلی کے سابق نائب وزیر اعلی منیش سسودیا، بوچی بابو گورنٹلا، ارجن پانڈے اور امندیپ ڈھل کو ملزم نامزد کیا ہے۔

سسودیا کی ملاقات پر عدالت سخت

اس سے پہلے جمعرات (1 جون) کو بھی منیش سسودیا کو راؤس ایونیو کورٹ میں پیش کیا گیا، جہاں ای ڈی کی چارج شیٹ کی سماعت ہوئی۔ آپ کو بتا دیں کہ ای ڈی نے منی لانڈرنگ معاملے میں منیش سسودیا کے خلاف مقدمہ درج کیا ہے۔ ای ڈی نے عدالت کو بتایا کہ چارج شیٹ کی کاپی تمام ملزمین کو دی گئی ہے۔

واضح رہے کہ جمعرات کو سخت موقف اختیار کرتے ہوئے عدالت نے کہا تھا کہ منیش سسودیا کو جیل میں صرف اہل خانہ اور ان کے وکیل سے ملنے کی اجازت ہوگی۔ ان کے علاوہ انہیں باہر کے لوگوں سے ملاقات کی اجازت نہیں ہوگی۔ اس دوران عدالت نے سسودیا کی پچھلی پیشی کے دوران بھیڑ جمع ہونے پر ناراضگی ظاہر کی تھی۔

منی لانڈرنگ کیس کی تحقیقات مکمل

ای ڈی نے بتایا ہے کہ اس نے منی لانڈرنگ کیس میں دہلی کے سابق نائب وزیر اعلیٰ کے مبینہ ملوث ہونے کی تحقیقات مکمل کر لی ہے۔ ای ڈی نے دعویٰ کیا ہے کہ اس کے پاس یہ ثابت  کرنے کے لیے کافی ثبوت ہیں کہ سسودیا منی لانڈرنگ میں ملوث تھے۔ انہوں نے مبینہ طور پر مختلف ذرائع سے 622 کروڑ روپے کی آمدنی حاصل کی تھی۔ بتا دیں کہ منیش سسودیا دہلی شراب پالیسی کیس میں تہاڑ جیل میں بند ہیں۔ ان کی ضمانت عرضی دہلی ہائی کورٹ نے 30 مئی کو مسترد کر دی تھی۔

بھارت ایکسپریس۔