KP Sharma Oli Nepal Protest: ملک میں آگ لگا کر کہاں غائب ہو گئے سابق وزیراعظم کے پی شرمااولی، نیپال کی راجدھانی میں چھایا ہےخوف کا عالم

نیپال اس وقت سنگین بحران سے گزر رہا ہے۔ ملک میں سوشل میڈیا ایپس پر پابندی کے بعد بھڑکی عوامی ناراضگی نے شدید تشدد کی صورت اختیار کر لی، جس میں کئی افراد جان سے ہاتھ دھو بیٹھے۔ اسی پس منظر میں پی ایم کے پی شرما اولی نے منگل (9 ستمبر) کوپی ایم کے عہدے سے استعفیٰ دے دیا تھا، لیکن وہ فی الحال کہاں ہیں، اس حوالے سے کوئی مصدقہ معلومات سامنے نہیں آئی ہیں۔پرتشدد مظاہرین نے کئی سرکاری عمارتوں کو آگ لگا دی، جب کہ بدھ (10 ستمبر) کی صبح دارالحکومت کٹھمنڈو کی سڑکوں پر خاموشی اور خوف کا عالم چھایا رہا۔
کیا اولی ملک چھوڑ کر جا چکے ہیں؟

میڈیا رپورٹس میں کہا گیا ہے کہ کے پی شرما اولی ممکنہ طور پر دبئی فرار ہو سکتے ہیں، لیکن ابھی تک ان کی موجودگی کے بارے میں کوئی مصدقہ اطلاع نہیں ملی ہے۔نیپالی میڈیا کا دعویٰ ہے کہ اولی اس وقت کٹھمنڈو کے ایک محفوظ مقام میں چھپے ہوئے ہیں۔
اہم بات یہ ہے کہ تری بھون انٹرنیشنل ایئرپورٹ کو بھی بند کر دیا گیا ہے، جس کی وجہ سے بیرون ملک پروازیں فی الحال منسوخ ہیں۔ ملک کی باگ ڈور فوج کے ہاتھوں میں دے دی گئی ہے، اور کٹھمنڈو کی سڑکوں پر فوجی گشت کر رہے ہیں۔
اولی کے گھر کو مظاہرین نے لگائی آگ
مظاہرین نہ صرف سرکاری دفاتر میں گھس گئے بلکہ کئی وزراء کو سڑکوں پر مارا پیٹا۔مظاہرین کے پی شرما اولی کے بھکتاپور میں واقع ذاتی گھر تک جا پہنچے اور گھر کو نذرِ آتش کر دیا۔قابل ذکر بات یہ ہے کہ اس وقت تک اولی مبینہ طور پر اپنے خاندان کے ساتھ فرار ہونے میں کامیاب ہو چکے تھے۔
قیاس کیا جا رہا ہے کہ وہ کسی خفیہ اور محفوظ مقام پر چھپے ہوئے ہیں۔نیپال کے سب سے مقدس مذہبی مقامات بدھ کے روز عوام کے لیے بند کر دئے گئے ہیں، تاکہ ان مقامات کو کسی ممکنہ نقصان سے محفوظ رکھا جا سکے۔
دارالحکومت میں سناٹا، کرفیو نافذ
بدھ کی صبح کٹھمنڈو میں سڑکیں تقریباً سنسان نظر آئیں۔لوگ گھروں سے باہر نکلنے سے گریز کر رہے ہیں۔شہر بھر میں کرفیو نافذ کر دیا گیا ہے۔آئی اے این ایس کی رپورٹ کے مطابق پرتشدد جھڑپوں میں اب تک کم از کم 22 افراد جاں بحق ہو چکے ہیں، جب کہ 500 سے زائد افراد زخمی ہیں۔

بھار ت ایکسپریس اردو