Two Indians killed and one abducted in Niger: نائجر کے ڈوسو میں دہشت گرد حملے میں دو بھارتی شہری ہلاک ،  اغوا ہندوستانی کی بیوی نے پی ایم مودی سے مداخلت کی اپیل کی

مغربی افریقی ملک نائجر میں مبینہ طور پر دہشت گردوں کے ہاتھوں اغوا کیے گئے ایک ہندوستانی شہری کی اہلیہ نے اپنے شوہر کی رہائی کے لیے مرکزی حکومت سے فوری مداخلت کی اپیل کی ہے۔ اغوا ہونے والا ہندوستانی شہری جموں و کشمیر کے ضلع رامبن کا رہائشی ہے۔

رامبن کی رہائشی شیلا دیوی نے بتایا کہ ان کے شوہر رنجیت سنگھ “ٹرانس ریل لائٹنگ لمیٹڈ” نامی ایک مربوط بجلی کی ترسیل اور تقسیم کی کمپنی میں سینئر سیکیورٹی آفیسر کے طور پر کام کر رہے تھے۔ انہوں نے کہا کہ 15 جولائی کے بعد سے خاندان کا رنجیت سنگھ سے کوئی رابطہ نہیں ہو پایا ہے۔

شیلا دیوی کا کہنا ہے: اب چار دن گزر چکے ہیں، اور مجھے ایسا لگتا ہے کہ میرے شوہر کو بازیاب کرانے کی کوئی سنجیدہ کوشش نہیں ہو رہی۔ انہوں نے الزام عائد کیا کہ کمپنی سے کئی بار رابطے کی کوشش کے باوجود انہیں کوئی تسلی بخش جواب نہیں دیا گیا۔ شیلا دیوی نے ہندوستانی وزیر اعظم نریندر مودی اور وزیر خارجہ ایس جے شنکر سے اپیل کرتے ہوئے کہامجھے معلوم نہیں کہ میرے شوہر کس حال میں ہیں۔

نائجر کے ڈوسو  علاقے میں ہونے والے دہشت گرد حملے میں دو بھارتی شہری ہلاک ، جب کہ ایک کو اغوا کر لیا گیا۔ اس واقعے کی اطلاع نائجر میں موجود بھارتی سفارت خانے نے سوشل میڈیا پلیٹ فارم “ایکس” پر دی۔ سفارت خانے نے کہا ہے کہ جاں بحق افراد کی لاشیں بھارت بھیجنے اور اغوا شدہ شہری کی بازیابی کے لیے مسلسل کوششیں کی جا رہی ہیں۔ بھارتی سفارت خانے نے نائجر میں مقیم تمام بھارتی شہریوں کو محتاط رہنے کی بھی ہدایت دی ہے۔

نائجر کے ڈوسو میں دہشت گرد حملہ

سوشل میڈیا پر جاری ایک پوسٹ میں بھارتی سفارت خانے نے کہا:”نائجر کے ڈوسو علاقے میں 15 جولائی کو ہونے والے ایک بہیمانہ دہشت گرد حملے میں دو بھارتی شہری افسوسناک طور پر جاں بحق ہو گئے اور ایک کو اغوا کر لیا گیا۔ ہم غمزدہ خاندانوں کے ساتھ دلی ہمدردی کا اظہار کرتے ہیں۔ نیامی (Niamey) میں موجود سفارت خانہ مقامی حکام سے رابطے میں ہے تاکہ لاشوں کو بھارت بھیجنے اور اغوا شدہ بھارتی شہری کی محفوظ واپسی کو یقینی بنایا جا سکے۔ نائجر میں تمام بھارتی شہریوں کو محتاط رہنے کا مشورہ دیا جاتا ہے۔”

رواں سال مارچ میں بھی ہوا تھا حملہ

عرب نیوز نے مقامی ذرائع کے حوالے سے بتایا کہ نامعلوم مسلح افراد نے دارالحکومت نیامی سے تقریباً 100 کلومیٹر (63 میل) دور ڈوسو علاقے میں ایک بجلی کی لائن کی تعمیر کے مقام پر تعینات نائجیرین فوجی یونٹ پر گھات لگا کر حملہ کیا۔ اس سے پہلے مارچ میں، نائجر میں گریٹر سہارا کے کوکورو (Kokoru) علاقے میں داعش (Islamic State) نے حملہ کیا تھا، جس میں 44 شہری مارے گئے تھے اور 13 شدید زخمی ہوئے تھے۔

نائجر میں سیاسی بحران جاری

یہ بات قابل ذکر ہے کہ نائجر اس وقت سیاسی بحران سے گزر رہا ہے، کیونکہ فوجی بغاوت کے ذریعے جمہوری طور پر منتخب صدر کو اقتدار سے ہٹا دیا گیا تھا۔ جولائی 2023 میں صدر محمد بازوم کو صدارتی گارڈ نے حراست میں لے لیا تھا، اور جنرل عبدالرحمن تیانی (Abdourahamane Tchiani) نے خود کو ملک کا نیا سربراہ قرار دے دیا تھا۔

بھارت ایکسپریس اردو