Haridwar Stampede: صدر جمہوریہ مرمو، وزیراعظم مودی اور وزیراعلیٰ دھامی نے مانسا دیوی حادثے پر دکھ کا اظہار کیا، وزیراعلیٰ نے معاوضے کا کیا  اعلان

ہری دوار کے مانسا دیوی مندر میں بھگدڑ کے واقعے میں 6 عقیدت مند جاں بحق ہو گئے ہیں، جب کہ متعدد کی حالت نازک بتائی جا رہی ہے۔ پولیس اور طبی ٹیمیں موقع پر موجود ہیں اور راحت و بچاؤ کا کام جاری ہے۔ صدر دروپدی مرمو، وزیراعظم نریندر مودی اور وزیراعلیٰ پشکر سنگھ دھامی نے اس واقعے پر گہرے رنج و غم کا اظہار کیا ہے۔ اسی دوران وزیراعلیٰ دھامی نے متاثرہ خاندانوں کے لیے مالی امداد کا اعلان بھی کیا ہے۔

صدر جمہوریہ دروپدی مرمو کا اظہار افسوس
صدر مرمو نے ایکس پر لکھا:” ہری دوار کے مانسا دیوی مندر کے راستے میں بھگدڑ کے واقعے میں کئی عقیدت مندوں کی موت کی خبر انتہائی دردناک ہے۔ میں سوگوار خاندانوں کے ساتھ دلی ہمدردی کا اظہار کرتی ہوں اور زخمیوں کی جلد صحتیابی کے لیے دعاگو ہوں۔”

وزیراعظم مودی کا اظہار افسوس

وزیراعظم نریندر مودی نے بھی اس حادثے پر افسوس کا اظہار کرتے ہوئے “ایکس” پر لکھا:”اتراکھنڈ کے ہری دوار میں مانسا دیوی مندر کے راستے پر بھگدڑ سے ہونے والے جانی و مالی نقصان پر گہرا دکھ ہے۔ جاں بحق افراد کے اہل خانہ سے دلی تعزیت اور زخمیوں کی جلد صحت یابی کی پراتھنا کرتا ہوں۔ مقامی انتظامیہ متاثرین کو ہر ممکن مدد فراہم کر رہا ہے۔”

Deeply saddened by the loss of lives due to a stampede on the route to Mansa Devi Temple in Haridwar, Uttarakhand. Condolences to those who lost their loved ones. May the injured recover soon. The local administration is assisting those affected: PM @narendramodi

وزیراعلیٰ پشکر سنگھ دھامی کا اعلان

وزیراعلیٰ دھامی نے ایکس پر لکھا: ” ہری دوار کے مانسا دیوی مندر کے راستے پر پیش آئے دل دہلا دینے والے حادثے میں 6 قیمتی جانوں کا ضیاع انتہائی افسوسناک ہے۔ میں ایشور سے پراتھنا کرتا ہوں  کہ وہ مرحومین کو اپنے چرنوں میں جگہ دے اور سوگوار خاندانوں کو یہ کربناک غم سہنے کی طاقت عطا کرے۔ ریاستی حکومت کی جانب سے جاں بحق افراد کے لواحقین کو 2-2 لاکھ روپے اور زخمیوں کو 50-50 ہزار روپے کی مالی امداد دی جائے گی۔ اس کے ساتھ ہی مجسٹریل انکوائری کے احکامات بھی دیے گئے ہیں۔”

بھگدڑ میں 6 افراد کی موت

گڑھوال منڈل کے کمشنر ونئے شنکر پانڈے نے ANI کو بتایا کہ مانسا دیوی مندر میں زیادہ بھیڑ ہونے کی وجہ سے بھگدڑ مچ گئی، جس میں 6 افراد جان سے ہاتھ دھو بیٹھے۔ وہ خود موقع پر روانہ ہو چکے ہیں۔

معاملہ کیا ہے؟

موصولہ معلومات کے مطابق یہ بھگدڑ مانسا دیوی مندر کی سیڑھیوں پر اچانک مچی، جس سے حادثہ پیش آیا۔ اس میں 6 افراد جاں بحق ہوئے اور کئی دیگر زخمی ہوئے ہیں۔ بھگدڑ کی اطلاع ملتے ہی پولیس فورس موقع پر پہنچی اور حالات قابو میں کرنے کی کوشش کی۔ کچھ زخمیوں کو شدید حالت میں اسپتال منتقل کیا گیا ہے، جب کہ مندر میں میڈیکل ٹیمیں بھی موجود ہیں جو زخمی عقیدت مندوں کا علاج کر رہی ہیں۔

بھارت ایکسپریس اردو