PM Modi On Nepal Flood: ہم نیپال کے ساتھ کھڑے ہیں، سیلاب سے پیدا ہونے والی سنگین صورتحال کا جائزہ لیتے ہوئے وزیراعظم مودی نے کی امداد کی پیشکش

نیپال میں شدید بارشوں کے باعث ہونے والی بڑی تباہی پر وزیراعظم نریندر مودی نے ہمدردی کا اظہار کیا ہے اور کہا ہے کہ بھارت نیپال کے عوام اور حکومت کے ساتھ کھڑا ہے۔

نیپال میں گزشتہ کچھ دنوں سے شدید مانسونی بارش کے باعث تباہ کن سیلاب اور زمین کھسکنے کے واقعات پیش آئے ہیں، جس کے نتیجے میں کافی جانی و مالی نقصان ہوا ہے۔ اس قدرتی آفت میں کم از کم 39 افراد ہلاک ہو چکے ہیں جبکہ 11 افراد تاحال لاپتہ ہیں۔ اس صورتحال پر بھارت کے وزیر اعظم نریندر مودی نے گہری ہمدردی کا اظہار کیا ہے۔ اتوار کو ایکس  پرپوسٹ شیئرکرتے ہوئے انہوں نے نیپال کی عوام اور حکومت کے ساتھ مضبوطی سے کھڑے ہونے کی بات کہی ہے۔

نیپال میں جمعے سے مسلسل شدید بارش ہو رہی ہے، جس کے نتیجے میں کئی علاقوں میں زمین کھسکنے اور سیلاب جیسی سنگین صورتحال پیدا ہو گئی ہے۔ کوشی میں 36  جبکہ مدھیش میں 3  افراد کی ہلاکت کی تصدیق ہوئی ہے، یوں ہلاکتوں کی مجموعی تعداد 39 ہو گئی ہے۔

وزیر اعظم مودی نے ایک پوسٹ کے ذریعے اپنی ہمدردی کا اظہار کرتے ہوئے کہا کہ نیپال میں شدید بارش سے ہونے والی جانی و مالی تباہی افسوسناک ہے۔ اس مشکل وقت میں ہم نیپال کی عوام اور حکومت کے ساتھ کھڑے ہیں۔ ایک دوست ہمسائے اور ابتدائی ردعمل دینے والے ملک کے طور پر، بھارت ہر ممکن امداد فراہم کرنے کے لیے پرعزم ہے۔

نیپال کے محکمہ موسمیات نے الرٹ جاری کیا

نیپال کے محکمہ موسمیات نے مزید شدید بارشوں کی پیش گوئی کی ہے، خاص طور پر مشرقی کوشی کے پہاڑی اضلاع میں۔ نیپال کے قدرتی آفات کے انتظامی ادارے کے مطابق، کئی اہم شاہراہیں زمین کھسکنے کی وجہ سے بند ہو گئی ہیں، اور متعدد پل سیلاب میں بہہ گئے ہیں۔ کاٹھمنڈو ایئرپورٹ نے مقامی پروازیں معطل کر دی ہیں، جبکہ بین الاقوامی پروازیں معمول کے مطابق چل رہی ہیں۔ کئی اضلاع میں ایمرجنسی نافذ کر دی گئی ہے اور لوگوں کو محفوظ مقامات پر منتقل ہونے کی ہدایت دی گئی ہے۔

بھارت کی طرف سے فوری امداد کی پیشکش

وزیر اعظم مودی کی فوری امداد کی پیشکش، بھارت-نیپال کے مضبوط دوطرفہ تعلقات کی عکاسی کرتی ہے۔ اگرچہ اتوار کی صبح تک بارش میں کچھ کمی آئی ہے، لیکن زمین کھسکنے کی وجہ سے کاٹھمنڈو وادی کو دیگر علاقوں سے ملانے والی اہم شاہراہیں بند ہیں اور ٹرانسپورٹ خدمات معطل ہیں۔ بھارت کی طرف سے امداد کی یہ یقین دہانی نہ صرف ایک اچھے ہمسائے کا فریضہ ہے بلکہ شراکت داری اور آفات سے نمٹنے میں تعاون کی ایک مثال بھی ہے۔

بھارت ایکسپریس اردو-