Yogi Adityanath: سی ایم یوگی کو جان سے مارنے کی دھمکی، کہا- ‘بابا صدیقی جیسا حال کردیں گے’، استعفیٰ کا کیامطالبہ

یوپی کے سی ایم یوگی آدتیہ ناتھ کو جان سے مارنے کی دھمکیاں موصول ہوئی ہیں۔ ممبئی پولیس کے کنٹرول روم میں یوپی کے سی ایم یوگی آدتیہ ناتھ کو لے کر دھمکی آمیز پیغام دیا گیا ہے۔ ممبئی پولیس کے ٹریفک کنٹرول ڈیپارٹمنٹ کو نامعلوم نمبر سے کال کرکے ایک شخص نے دھمکی دی ہے کہ اگر یوگی آدتیہ ناتھ نے 10 دن کے اندر استعفیٰ نہیں دیا تو ان کی حالت بابا صدیقی جیسی ہو جائے گی۔ گزشتہ ہفتہ کی شام کو یہ دھمکی آمیز پیغام موصول ہونے کے بعد ممبئی پولیس نے اس معاملے کی تحقیقات شروع کر دی ہے۔ نامعلوم شخص کی تلاش جاری ہے۔

بابا صدیقی کا قتل

آپ کو بتا دیں کہ حال ہی میں مہاراشٹر کے سینئر این سی پی لیڈر بابا صدیقی کو گولی مار کر ہلاک کر دیا گیا تھا۔ بابا صدیقی کے قتل کے بعد ممبئی پولیس اس معاملے کی مسلسل تحقیقات کر رہی ہے۔ بابا صدیقی کو ان کے بیٹے کے دفتر کے باہر قتل کیا گیا تھا۔ ملزمان نے بابا صدیقی پر کئی راؤنڈ فائر کیے جس کے بعد ان کی حالت تشویشناک ہوگئی تھی۔ بابا صدیقی کو فوری طور پر اسپتال لے جایا گیا، جہاں انہیں مردہ قرار دے دیا گیا۔ وہیں  بابا صدیقی کے قتل کے بعد دھمکیوں کا سلسلہ تھمنے کا نام نہیں لے رہا۔

پپو یادو کو بھی جان سے مارنے کی دھمکی

بابا صدیقی کے قتل کے بعد اب بہار کی پورنیا لوک سبھا سیٹ سے رکن پارلیمنٹ پپو یادو کو بھی مسلسل جان سے مارنے کی دھمکیاں مل رہی ہیں۔ پپو یادو نے پولیس سے لے کر وزارت داخلہ تک اس کی شکایت کی ہے۔ حالانکہ پولیس کا کہنا ہے کہ پپو یادو کو دھمکیاں دینے والے ملزم کو گرفتار کر لیا گیا ہے، لیکن پپو یادو نے ابھی بھی سی سی ٹی وی فوٹیج جاری کرتے ہوئے کہا ہے کہ ان کے گھر کی ریکی کی گئی ہے۔ ابھی بھی ان کی جان کو خطرہ ہے، پولیس نے کس کو گرفتار کیا ہے اس کے بارے میں اسے کچھ نہیں معلوم۔

بھارت ایکسپریس