Farmer Protest 2024: شمبھوبارڈر پراحتجاج تیز! آج کسان پنجاب سے باہر ٹریکٹر مارچ  کرنے پر بضد، کسان رہنما سرون سنگھ پنڈھر نے کیا اعلان

شمبھو بارڈر پر احتجاج شدت اختیار کر گیا، آج کسان پنجاب سے باہر ٹریکٹر لے کر مارچ کرنے جا رہے ہیں۔ گزشتہ روز کسان لیڈر سرون سنگھ پنڈھر نے اعلان کیا تھا کہ 16 دسمبر کو کسان پنجاب سے باہر ٹریکٹر مارچ نکالیں گے۔ کسان رہنما سرون سنگھ پنڈھر نے یہ بھی کہا کہ مارچ کے بعد 18 دسمبر کو پنجاب میں ‘ریل روکو’ مہم شروع کی جائے گی۔ یہ اعلان ایک ایسے وقت میں کیا گیا ہے، جب صرف چند گھنٹے قبل 101 کسانوں کے ایک گروپ کو پولیس نے شمبھو بارڈر پر سیکورٹی وجوہات کی بنا پر روکا تھا اور پھر انہیں دن بھر کے لیے واپس بلایا گیا تھا۔

لیکن کسان پولیس کی رکاوٹوں اور بھاری تعیناتی کے باوجود اپنے احتجاج پر ڈٹے رہے

کسان رہنما سرون سنگھ پنڈھر نے نیوز ایجنسی اے این آئی کو بتایا، “16 دسمبر کو پنجاب سے باہر ٹریکٹر مارچ نکالا جائے گا اور 18 دسمبر کو ہم نے پنجاب میں ‘ریل روکو’ کی کال دی ہے۔ ہم تمام پنجابیوں سے بڑی تعداد میں شرکت کی اپیل کرتے ہیں”۔ قابل ذکر بات یہ ہے  کہ اس سے  پہلے دن میں سیکورٹی فورسز نے شمبھو بارڈر (‘دہلی مارچ’) سے دہلی کی طرف مارچ کرنے والے کسانوں کے گروپ کو منتشر کرنے کے لیے آنسو گیس اور واٹر کینن کا استعمال کیا تھا۔ لیکن کسان پولیس کی رکاوٹوں اور بھاری تعیناتی کے باوجود اپنے احتجاج پر ڈٹے رہے۔

آنسو گیس اور واٹر کینن کے استعمال کے بعد 17 کسان زخمی ہو گئے تھے

اس کے بارے میں کسان رہنما سرون سنگھ پنڈھر نے دعویٰ کیا کہ شمبھو بارڈر پر مظاہرین کو منتشر کرنے کے لیے پولیں کے آنسو گیس اور واٹر کینن کے استعمال کے بعد 17 کسان زخمی ہو گئے تھے۔ انہوں نے مزید الزام لگایا کہ کئی کسانوں کی حالت تشویشناک ہے اور حکام پر اسپتال میں علاج کی فراہمی میں لاپرواہی کررہی ہے۔

کسان رہنما سرون سنگھ پنڈھر نے کہا، “دنیا کی 5ویں سب سے بڑی معیشت بھارت کی حکومت نے 101 کسانوں کے خلاف طاقت کا استعمال کیا۔واٹر کینن کا استعمال کرتے ہوئے، انہوں نے ہم پر کیمیکل پانی پھینکا اور آنسو گیس کے گولے داغے۔ 17 کسان زخمی ہوئے۔ جن میں سے کئی کی حالت نازک ہے۔ انہیں  اسپتالوں میں مناسب علاج  فراہم نہیں کیا جا رہا ہے، ہم پنجاب حکومت سے مطالبہ کرتے ہیں کہ مناسب علاج کو یقینی بنایا جائے۔

 کسان لیڈر سرون سنگھ پنڈھر نے راہل گاندھی پر وعدہ خلافی کا لگایا الزام

قابل ذکر بات یہ ہے کہ  کسان رہنما سرون سنگھ پنڈھر نے پارلیمنٹ کے جاری سرمائی اجلاس میں کسانوں کے خدشات کو مؤثر طریقے سے حل نہ کرنے پر اپوزیشن پر بھی تنقید کی۔ انہوں نے خاص طور پر کانگریس لیڈر راہل گاندھی پر کسانوں سے کئے گئے وعدوں کو پورا کرنے میں ناکام رہنے  کا الزام لگایا۔

کسان رہنما سرون سنگھ پنڈھر  نے کہا، “اپوزیشن کو محض بیانات جاری کر کے اپنی ذمہ داری سے پیچھے نہیں ہٹنا چاہیے۔ انہیں ہمارا ایجنڈا پہنچانا چاہیے اور ہمارے مسائل پر اسی طرح  سے  پارلیمنٹ میں ہماری آواز کو اٹھانا  چاہیے جیسا کہ وہ دوسرے معاملات کے لیے کرتے ہیں۔ راہل گاندھی پارلیمنٹ میں ہماری پریشانیوں کو نہیں اٹھا رہے ہیں، جیسا کہ انہوں نے  ہمیں یقین دلایا تھا۔ “

بھارت ایکسپریس