Tunnel Accident: مشین کے سامنے بار بار لوہے کی چیزیں آنے کی وجہ سے کام متاثر ہو رہا ہے۔ اب تک 47 میٹر تک ڈرلنگ کی جا چکی ہے

Tunnel Accident: اتراکھنڈ کے اترکاشی ضلع میں یمونوتری نیشنل ہائی وے پر زیر تعمیر سلکیارا ٹنل حادثے میں پھنسے 41 مزدوروں کو بچانے کا آپریشن ابھی تک مکمل نہیں ہو سکا ہے۔ 25 نومبر مہم کا 14 واں دن ہے۔ ریسکیو آپریشن کے لیے ڈرلنگ کا آخری مرحلہ ایک بار پھر رکاوٹ کے باعث روکنا پڑا۔

خبر رساں ایجنسی آئی اے این ایس کی رپورٹ کے مطابق 24 نومبر جمعہ کی رات 47 میٹر پر ڈرلنگ کا کام روکنا پڑا۔ سرنگ میں نو پائپ کو ڈرل کیا جارہا ہے ۔ این ایچ آئی ڈی سی ایل کے جنرل منیجر کرنل دیپک پاٹل نے کہا کہ مشین کے سامنے بار بار لوہے کی چیزیں آنے کی وجہ سے کام متاثر ہو رہا ہے۔ اب تک 47 میٹر تک ڈرلنگ کی جا چکی ہے۔ تقریباً دس میٹر مزید ڈرلنگ باقی ہے۔

کھدائی(ڈرلنگ) دوبارہ شروع ہو جائے گی

ذرائع نے بتایا ہے کہ آج بروز ہفتہ ایک بار پھر پائپ کے راستے میں آنے والی لوہے کی جالی کو کاٹ کر ہٹا دیا جائے گا اور دوبارہ ڈرلنگ شروع کر دی جائے گی۔ اوجر مشین جس سے ڈرلنگ کی جا رہی ہے وہ ایک گھنٹے میں تقریباً 2 میٹر ڈرل کرتی ہے۔ اس لیے آج بھی ریسکیو آپریشن کب ختم ہو گا اس کا تعین نہیں کیا جا رہا۔

سی ایم پشکر سنگھ دھامی موقع پر موجود ہیں

دوسری جانب سی ایم پشکر سنگھ دھامی بدستور موقع پر موجود ہیں۔ انہوں نے اپنا عارضی کیمپ یہاں بنا رکھا ہے۔ جہاں سے وہ دیگر کام بھی کر رہے ہیں اور ریسکیو آپریشن کی نگرانی بھی کر رہے ہیں۔ انہوں نے کہا کہ یہ ایک بہت ہی چیلنجنگ اور پرخطر ریسکیو آپریشن ہے۔ ٹیمیں پوری مستعدی اور صلاحیت کے ساتھ اس ریسکیو آپریشن میں مصروف ہیں۔

پی ایم او کی جانب  سے مسلسل نگرانی کی جا رہی ہے

راحت اور بچاؤ کی کارروائیوں کی براہ راست وزیراعظم کے دفتر (PMO) سے نگرانی کی جا رہی ہے۔ پی ایم مودی ہر روز وزیر اعلی پشکر سنگھ دھامی کو فون کر رہے ہیں اور مہم کے بارے میں اپ ڈیٹ حاصل کر رہے ہیں۔ انہوں نے ہدایت کی ہے کہ بہتر علاج معالجے اور کارکنوں کے گھر جانے کے انتظامات کئے جائیں۔

قابل ذکربا ت یہ ہے کہ  دیوالی کی صبح یعنی 12 نومبر کی صبح 41 مزدور زیر تعمیر سرنگ گرنے سے پھنس گئے تھے۔ انہیں بچانے کے لیے ان کے پاس 80 سینٹی میٹر قطر کا پائپ لایا گیا ہے، جس میں رولنگ اسٹریچر رکھا جائے لیکن آخری پائپ بچھانے کے راستے میں بار بار رکاوٹوں کی وجہ سے ڈرلنگ روکنی پڑی۔ واقعے کے دن سے پائپ لائن کے ذریعے اندر پھنسے مزدوروں تک کھانا پہنچایا جا رہا ہے۔ تمام کارکن صحت مند ہیں۔