Yog at Tihar Jail: ’’یوگا اور دھیان قیدیوں کی زندگی میں مثبت تبدیلی کا مؤثر ذریعہ‘‘ تہاڑ جیل میں عالمی یوم یوگا کا انعقاد، تین سو سے زائد قیدیوں نے یوگ میں لیا حصہ

نئی دہلی: 12ویں بین الاقوامی یوگ کے دن کے موقع پر مرکزی جیل تہاڑ، جیل نمبر 3 میں یوگا سیشن کا انعقاد کیا گیا، جس میں 300 سے زائد قیدیوں نے جوش و خروش کے ساتھ شرکت کی۔ اس پروگرام کا اہتمام مرارجی دیسائی نیشنل انسٹی ٹیوٹ آف یوگا، وزارتِ آیوش، حکومت ہند کے تعاون سے انٹرنیشنل نیچروپیتھی آرگنائزیشن (INO) اور سوریہ فاؤنڈیشن نے کیا۔ یہ پروگرام جیل سپرنٹنڈنٹ پرمود کمار گپتا کی نگرانی اور آئی این او کے قومی صدر و بین وزارتی کمیٹی (IDY-2026) کے رکن ڈاکٹر اننت برادار کی قیادت میں منعقد ہوا۔

یوگا سے قیدیوں کی ذہنی و جذباتی بحالی ممکن

تقریب کا آغاز اگنی ہوتر اور شمع روشن کرنے کی رسم سے ہوا۔ افتتاحی خطاب میں ڈاکٹر اننت برادار نے کہا کہ یوگا صرف جسمانی ورزش نہیں بلکہ ذہنی اور جذباتی تربیت کا بھی اہم ذریعہ ہے۔ انہوں نے کہا کہ جیل میں رہنے والے افراد کے ذہنی دباؤ، تنہائی اور جارحانہ رویوں پر قابو پانے اور ان کی زندگی میں مثبت تبدیلی لانے میں یوگا اور دھیان انتہائی مؤثر کردار ادا کرتے ہیں، تاکہ وہ معاشرے میں ایک بہتر اور ذمہ دار شہری کی حیثیت سے واپس لوٹ سکیں۔ انہوں نے بتایا کہ سوریہ فاؤنڈیشن اور آئی این او کی جانب سے 12ویں بین الاقوامی یومِ یوگا کے موقع پر ملک کی 25 ریاستوں میں سات ہزار مقامات پر یوگا پروگرام منعقد کیے گئے۔

تہاڑ جیل میں اصلاحی سرگرمیوں کو فروغ

ڈاکٹر اننت برادار نے کہا کہ تہاڑ جیل میں قیدیوں کی اصلاح اور خود روزگار کے فروغ کے لیے مختلف تربیتی پروگرام کامیابی سے چلائے جارہے ہیں۔ جیل نمبر 3 میں قیدیوں کو پینٹنگ، بڑھئی گیری، یوگا، علمی سرگرمیوں، آیوروید اور قدرتی کھیتی جیسے شعبوں میں تربیت دی جارہی ہے، جس سے جیل کا ماحول ایک اصلاحی اور تربیتی مرکز کی شکل اختیار کرتا جا رہا ہے۔

مشترکہ یوگا پروٹوکول اور شجرکاری

وزارتِ آیوش کے تحت سنٹرل کونسل فار ریسرچ اِن یوگا اینڈ نیچروپیتھی (CCRYN) کے تعاون سے یوگا ٹرینرز یوگتا اور خوشبو نے شرکا کو مشترکہ یوگا پروٹوکول کی مشق کرائی۔ اس موقع پر یوگا آچاریہ یودھشٹھیر پال نے بڑھتی عمر میں یوگا کی اہمیت پر روشنی ڈالی، جبکہ رویندر جاجو نے اگنی ہوترا ہون کی افادیت بیان کی۔ پروگرام کے اختتام پر ڈاکٹر اننت برادار نے تہاڑ جیل میں شجرکاری کی اور جیل کے احاطے میں قائم گئوشالا کا بھی معائنہ کیا۔

تحقیقی مرکز قائم کرنے کی تجویز

جیل سپرنٹنڈنٹ پرمود کمار گپتا نے جیل میں یوگا اور نیچروپیتھی کی تربیت اور تحقیق کے لیے مستقل مرکز قائم کرنے کی خواہش ظاہر کی، جس پر ڈاکٹر اننت برادار نے وزارتِ آیوش کے تعاون سے اس تجویز پر عمل درآمد کا یقین دلایا۔ اس پروگرام کو کامیاب بنانے میں آئی این او، دہلی کی مغربی زون کی صدر ڈاکٹر رنجنا چندرا، دہلی-این سی آر کی مشترکہ سکریٹری ڈاکٹر نیرو سین اور کرشنا نام دیو نے اہم کردار ادا کیا۔ تقریب کا انعقاد تہاڑ جیل کے ڈائریکٹر جنرل آنند موہن (آئی پی ایس)، اے آئی جی پنکج کمار (آئی اے ایس) اور ڈی آئی جی کلدیپ سنگھ (DANICS) کی رہنمائی اور تعاون سے عمل میں آیا۔

بھارت ایکسپریس اردو۔