Women’s Reservation Bill: لوک سبھا میں خواتین ریزرویشن بل مسترد، پرینکا گاندھی کا پہلا ردعمل  آیا سامنے

نئی دہلی:لوک سبھا میں 131ویں آئینی ترمیم یعنی خواتین ریزرویشن بل ووٹنگ کے دوران منظور نہیں ہو سکا۔ کل 532 ووٹوں میں سے 298 بل کے حق میں، جب کہ 230 مخالفت میں پڑے، تاہم مطلوبہ اکثریت نہ ملنے کے باعث بل مسترد ہو گیا۔اس پر پرینکا گاندھی نے سخت ردعمل دیتے ہوئے کہا کہ کانگریس خواتین ریزرویشن کی مخالفت نہیں کرتی، لیکن اسے پرانی مردم شماری اور حد بندی (ڈیلمیٹیشن) سے جوڑنا قابل قبول نہیں ہے، خاص طور پر جب اس میں او بی سی طبقے کو شامل نہیں کیا گیا۔ انہوں نے اسے جمہوریت اور ملک کی یکجہتی کے لیے “جیت” قرار دیا اور کہا کہ یہ آئین پر حملہ تھا جسے روک دیا گیا۔

“مسیحا بننے کی کھوکھلی کوشش ناکام“

پرینکاگاندھی نے سوشل میڈیا پلیٹ فارم ایکس پر پوسٹ کرتے ہوئے لکھا کہ پارلیمنٹ اور اسمبلیوں میں خواتین ریزرویشن ملک کی خواتین کا حق ہے اور ایک دن یہ ضرور حقیقت بنے گا۔انہوں نے کہا کہ 2011 کی مردم شماری اور اس پر مبنی حد بندی سے جوڑ کر نریندر مودی کی خواتین کے مسیحا بننے کی کوشش آج ناکام ہو گئی۔پرینکا گاندھی نے مزید لکھا کہ اپوزیشن نے اتحاد کا مظاہرہ کرتے ہوئے جمہوریت اور ملک کی سالمیت کو محفوظ رکھا۔ انہوں نے اپوزیشن کے تمام ارکان پارلیمنٹ کا شکریہ ادا کرتے ہوئے کہا کہ اگر یہ بل منظور ہو جاتے تو ملک میں جمہوریت کو نقصان پہنچ سکتا تھا۔

خواتین ریزرویشن پر لوک سبھا میں گرما گرم بحث

خواتین ریزرویشن بل پر حکومت اور اپوزیشن کے درمیان سخت بحث دیکھنے کو ملی۔ نریندر مودی نے تمام جماعتوں سے بل کی حمایت کی اپیل کی، جب کہ اپوزیشن نے اس پر سنجیدہ اعتراضات اٹھائے۔راہل گاندھی نے لوک سبھا میں خطاب کرتے ہوئے اس بل کو “فریب” قرار دیا اور کہا کہ یہ بل یہیں گر جائے گا۔ انہوں نے دعویٰ کیا کہ یہ واقعی خواتین کے مفاد میں نہیں ہے۔راہل گاندھی نے کہا کہ 2023 میں منظور ہونے والے خواتین ریزرویشن بل کے وقت ہی حکومت کے اتحادیوں نے اشارہ دیا تھا کہ اس کے نفاذ میں کافی وقت لگ سکتا ہے، اور موجودہ تجویز اصل مسئلے سے توجہ ہٹانے کی کوشش ہے۔

بھارت ایکسپریس اردو