Rule Change in September:ستمبرشروع ہوتے ہی آپ کی جیب پرپڑے گا اثر؟LPG سے ہوائی سفرتک بدلنے والے ہیں یہ قوانین

نئی دہلی: ستمبر 2026 کی پہلی تاریخ سے ملک میں کئی اہم تبدیلیاں نافذ ہونے والی ہیں، جن کا براہ راست اثر عام لوگوں کی جیب اور روزمرہ کے اخراجات پر پڑ سکتا ہے۔ ایل پی جی سلینڈر کی قیمت، ایندھن کے نرخ، گاڑیوں کی قیمت اور ہوائی سفر سے متعلق قواعد میں تبدیلی متوقع ہے۔ اس کے علاوہ گھریلو ایل پی جی صارفین کے لیے ای-کے وائی سی مکمل کرنا بھی ضروری ہوگا۔ ہر ماہ کی پہلی تاریخ کو تیل مارکیٹنگ کمپنیاں ایل پی جی سلینڈر کی نئی قیمتیں جاری کرتی ہیں۔ اگست میں کمرشل ایل پی جی سلینڈر کی قیمت میں کمی کی گئی تھی، جبکہ گھریلو سلینڈر کے نرخ مستحکم رہے تھے۔ اب یکم ستمبر کو نئے نرخ جاری کیے جائیں گے، جن میں تبدیلی کی صورت میں گھریلو بجٹ متاثر ہو سکتا ہے۔

ایل پی جی ای-کے وائی سی کی آخری تاریخ

گھریلو LPG صارفین کے لیے ای-کے وائی سی مکمل کرنے کی آخری تاریخ 31 اگست مقرر کی گئی ہے۔ IOCL، BPCL اور HPCL کی جانب سے اس کی مہلت بڑھائی گئی تھی۔ اگر مقررہ وقت تک ای-کے وائی سی مکمل نہیں کی گئی تو یکم ستمبر کے بعد LPG سلینڈر کی فراہمی میں دشواری پیش آ سکتی ہے یا اضافی اخراجات کا سامنا کرنا پڑ سکتا ہے۔

ATF، CNG اور PNG کے نرخ بھی بدل سکتے ہیں

ستمبر کے آغاز میں ایوی ایشن ٹربائن فیول یعنی ATF کی قیمتوں میں بھی نظرثانی ہوگی۔ ATF کی قیمت میں تبدیلی کا اثر ایئر لائنز کے آپریٹنگ اخراجات اور بالآخر ہوائی سفر کے کرایوں پر پڑ سکتا ہے۔ اس کے ساتھ CNG اور PNG کی قیمتوں میں بھی ردوبدل ممکن ہے، جس سے گاڑی چلانے اور گھریلو ایندھن کے اخراجات متاثر ہو سکتے ہیں۔

ٹاٹا اور ہنڈائی کی گاڑیاں مہنگی ہوں گی

کار خریدنے والوں کے لیے بھی یکم ستمبر سے تبدیلی اہم ہے۔ ٹاٹا موٹرز نے یکم ستمبر سے اپنی کاروں اور SUV کی قیمتوں میں 25 ہزار روپے تک اضافے کا اعلان کیا ہے۔ یہ اضافہ پیٹرول، ڈیزل اور الیکٹرک گاڑیوں پر نافذ ہوگا۔ ہنڈائی نے بھی رواں سال تیسری مرتبہ اپنی گاڑیوں کی قیمتیں بڑھانے کا فیصلہ کیا ہے۔

ہوائی اڈے پر امیگریشن کا عمل ہوگا آسان

غیر ملکی سفر کرنے والے مسافروں کے لیے امیگریشن سے متعلق بھی اہم تبدیلی ہونے والی ہے۔ اب بورڈنگ پاس پر اسٹیمپ لگوانے کی ضرورت نہیں ہوگی۔ مسافر اپنے موبائل فون پر الیکٹرانک بورڈنگ پاس یا اس کی پرنٹ شدہ کاپی دکھا کر امیگریشن کا عمل مکمل کر سکیں گے۔ اس تبدیلی سے وقت کی بچت کے ساتھ مسافروں کو اضافی پریشانی سے بھی راحت ملنے کی امید ہے۔ ستمبر سے نافذ ہونے والی ان تبدیلیوں میں ایل پی جی اور ایندھن کی قیمتوں سے لے کر گاڑیوں اور ہوائی سفر تک کئی شعبے شامل ہیں۔ ایسے میں صارفین کے لیے یکم ستمبر سے پہلے متعلقہ نئے نرخ اور قواعد جاننا اہم ہوگا۔

بھارت ایکسپریس اردو۔