Prime Minister Modi’s ‘Khelo India Dialogue’:وزیراعظم مودی آج’کھیلوانڈیاڈائیلاگ‘کے دوران نوجوان ایتھلیٹس سے کریں گے خطاب

نئی دہلی: وزیر اعظم نریندر مودی جمعرات کو ملک بھر میں منعقد ہونے والے پروگرام ’کھیلو انڈیا ڈائیلاگ – کھیل کی بات، پردھان منتری مودی کے ساتھ‘ کے تحت نوجوان ایتھلیٹس اور نوجوان لیڈروں سے خطاب کریں گے۔ نیشنل اسپورٹس ڈے 2026 کے موقع پر یہ پروگرام 1500 سے زائد تعلیمی اداروں میں ورچوئل طریقے سے منعقد کیا جائے گا۔ یہ بڑے پیمانے پر منعقد ہونے والا نوجوانوں کی شرکت کا پروگرام ابھرتے ہوئے ایتھلیٹس، طلبہ، پالیسی سازوں اور معروف کھلاڑیوں کو ایک پلیٹ فارم پر لائے گا۔ اس کا مقصد بھارت کے اسپورٹس ایکو سسٹم کو مضبوط بنانے اور ملک کے نوجوانوں کے لیے کھیل کے شعبے میں مزید مواقع پیدا کرنے کے حوالے سے خیالات کے تبادلے کا موقع فراہم کرنا ہے۔

آئی آئی ٹی، آئی آئی ایم اور ایمس سمیت کئی ادارے ہوں گے شریک

وزیر اعظم مودی کے ورچوئل خطاب کے بعد ملک بھر میں شرکت کرنے والے اداروں میں بیک وقت فزیکل پروگرام منعقد کیے جائیں گے۔ آئی آئی ٹی، آئی آئی ایم، ایمس، معروف میڈیکل کالج اور یونیورسٹیاں اس پروگرام میں حصہ لینے والے اداروں میں شامل ہیں۔ اس پہل میں کھیل کے شعبے سے متعلق کئی اہم موضوعات پر توجہ دی جائے گی۔ ان میں نچلی سطح پر کھیلوں کے بنیادی ڈھانچے کو مضبوط بنانا، کوچنگ اور مسابقتی مواقع فراہم کرنا، 2036 اولمپکس کو مدنظر رکھتے ہوئے باصلاحیت کھلاڑیوں کی شناخت اور ان کی تربیت، گورننس اور قیادت میں نوجوانوں کی شرکت بڑھانا اور انہیں مستقبل کی مہارتوں، رضاکارانہ سرگرمیوں اور ملک کی تعمیر کے مواقع فراہم کرنا شامل ہے۔

معروف کھلاڑی نوجوانوں سے کریں گے گفتگو

پروگرام کا ایک خاص حصہ نوجوان شرکا اور بھارت کے معروف ایتھلیٹس و اولمپک میڈلسٹ کے درمیان براہ راست گفتگو ہوگا۔ دیپا کرماکر، سائنا نہوال، گگن نارنگ، شری جیش، میری کوم، بائچنگ بھوٹیا، پُلیلا گوپی چند، انجوبابی جارج، کرنم ملیشوری، میرابائی چانو اور پی ٹی اوشا سمیت مختلف کھیلوں کے کئی نامور کھلاڑی نوجوانوں سے بات چیت کریں گے۔ اس دوران وہ کھیلوں میں اپنے سفر، مشکلات، کامیابیوں اور تجربات کے بارے میں نوجوانوں کے ساتھ اپنے خیالات شیئر کریں گے۔

کھیل سے آگے بھی نوجوانوں کی شرکت پر زور

یہ پروگرام صرف کھیل برادری تک محدود نہیں رہے گا۔ ارکان پارلیمنٹ، ارکان اسمبلی، مرکزی وزرا، وزرائے مملکت اور ریاستی وزرائے کھیل بھی مختلف مقامات پر پروگرام میں شرکت کریں گے اور نوجوانوں کے ساتھ ان چار اہم موضوعات پر تبادلہ خیال کریں گے۔ صلاحیتوں کی ترقی پر توجہ بھارت کے طویل مدتی اولمپک اہداف سے جوڑنے کی کوشش کی جائے گی۔ اس میں سائنسی طریقے سے باصلاحیت کھلاڑیوں کی شناخت، ایتھلیٹس کی ترقی اور نوجوان کھلاڑیوں کے لیے نچلی سطح سے اعلیٰ سطح تک پہنچنے کا مضبوط راستہ تیار کرنے جیسے موضوعات شامل ہوں گے۔ منتظمین اس پروگرام کے ذریعے نیشنل اسپورٹس ڈے کے بعد بھی نوجوانوں کی مسلسل شرکت کو فروغ دینے کا منصوبہ بنا رہے ہیں۔ شرکا کو وکست بھارت ینگ لیڈرز ڈائیلاگ کوئز میں حصہ لینے اور ’مائی بھارت‘ پورٹل پر رجسٹریشن کے لیے بھی حوصلہ افزائی کی جائے گی۔

بھارت ایکسپریس اردو۔