Special Intensive Revision-SIR: راہل گاندھی نے جب بھی ملک کے مفاد میں آواز اٹھائی، بی جے پی کو یو-ٹرن لینا پڑا، بہار میں ووٹر نظرثانی پر کانگریس کا الزام

کانگریس نے بہار میں ووٹرس کی خصوصی نظرثانی (Special Intensive Revision – SIR) کے عمل پر شدید اعتراض کرتے ہوئے کہا ہے کہ الیکشن کمیشن ووٹ کے حق کو چھیننے کے لیے لگاتار سازشی قدم اٹھا رہا ہے۔ پارٹی کا الزام ہے کہ ووٹروں کو جان بوجھ کر ووٹر لسٹ سے ہٹایا جا رہا ہے۔

ای سی آر کو غیر معمولی اختیارات، بی ایل اوز پر دباؤ

بہار کانگریس کے صدر راجیش کمار نے پریس کانفرنس میں انکشاف کیا کہ الیکشن کمیشن نے جو ای سی آر (Electoral Registration Officer) مقرر کیے ہیں، انہیں حکومت سے جڑا ہونے کے سبب وسیع اختیارات حاصل ہیں۔ ان کے مطابق کئی بی ایل اوز (Booth Level Officers) نے بتایا ہے کہ ان پر دباؤ ہے کہ 9 جولائی کے چکہ جام سے پہلے 50 فیصد انرولمنٹ کا کام مکمل کر لیں۔

کانگریس کا ڈیٹا پر سوال، شفافیت پر تشویش

راجیش کمار نے کہا کہ الیکشن کمیشن کے بلیٹن کے مطابق 36.47 فیصد ووٹروں کو انرول کیا جا چکا ہے، لیکن اپلوڈڈ ڈیٹا صرف 11.26 فیصد ہے۔ یہ اعداد و شمار خود ایک بڑا سوال پیدا کرتے ہیں کہ آخر شفافیت کہاں ہے؟

راہل گاندھی ہمیشہ ثابت قدم، حکومت کو ماننا پڑی بات

کانگریس کا کہنا ہے کہ راہل گاندھی جب بھی ملک کے مفاد میں بولے، حکومت کو یو-ٹرن لینا پڑا۔ کووڈ، نوٹ بندی اور جی ایس ٹی جیسے ایشوز پر ان کی پیش گوئیاں درست ثابت ہوئیں۔ راجیش کمار کے مطابق: راہل گاندھی نے کہا تھا نوٹ بندی معیشت تباہ کر دے گی — اور ہوا بھی یہی۔ جی ایس ٹی پر خبردار کیا — آج چھوٹے کاروبار بند ہو رہے ہیں۔

9 جولائی کو چکہ جام، راہل گاندھی کی شرکت طے

کانگریس نے اعلان کیا ہے کہ 9 جولائی کو راہل گاندھی ’چکہ جام‘ مظاہرے کی حمایت میں شامل ہوں گے۔ یہ احتجاج انکم ٹیکس دفتر سے شروع ہو کر شہید اسمارک اور پھر الیکشن کمیشن کے دفتر تک مارچ کی شکل میں ہوگا۔

ووٹ بندی کے خلاف سپریم کورٹ میں عرضی، سماعت جلد

کانگریس نے بتایا کہ بہار میں مبینہ ووٹ بندی کے خلاف سپریم کورٹ میں عرضی داخل کی جا چکی ہے، جسے قبول بھی کر لیا گیا ہے۔ اب اس پر جلد سماعت متوقع ہے۔

بھارت ایکسپریس اردو۔