All India Weather Update: ملک بھر میں مانسون کا الرٹ، آئندہ 10 گھنٹوں میں 15 ریاستوں میں آندھی، طوفان اور موسلا دھار بارش کی پیش گوئی

نئی دہلی : ملک کے مختلف حصوں میں مانسون نے شدت اختیار کر لی ہے، جہاں کئی علاقوں میں بارش نے گرمی سے راحت پہنچائی ہے، وہیں متعدد ریاستوں میں یہی بارش عوام کے لیے مشکلات کا سبب بن گئی ہے۔ ممبئی سمیت کئی شہروں میں مسلسل موسلا دھار بارش سے معمولاتِ زندگی بری طرح متاثر ہوئے ہیں۔ اس دوران محکمۂ موسمیات نے آئندہ 10 گھنٹوں کے لیے بڑا الرٹ جاری کرتے ہوئے 15 ریاستوں میں تیز آندھی، طوفانی ہواؤں اور شدید بارش کی پیش گوئی کی ہے۔ محکمہ کے مطابق بعض مقامات پر ہواؤں کی رفتار 70 کلومیٹر فی گھنٹہ تک پہنچ سکتی ہے۔جن ریاستوں کے لیے الرٹ جاری کیا گیا ہے ان میں اتر پردیش، بہار، دہلی، ہریانہ، پنجاب، ہماچل پردیش، اتراکھنڈ، جموں و کشمیر، جھارکھنڈ، مغربی بنگال، اڈیشہ، مدھیہ پردیش، چھتیس گڑھ، آسام اور تریپورہ شامل ہیں۔ متعلقہ ریاستی حکومتوں اور ضلعی انتظامیہ کو الرٹ رہنے اور عوام کو احتیاطی تدابیر اختیار کرنے کی ہدایت دی گئی ہے۔

 دہلی- این سی آر میں آئندہ چند روز تک بادل چھائے رہنے اور کہیں کہیں ہلکی بارش کے امکانات ہیں، تاہم شدید بارش کی توقع نہیں ہے۔ اس کے باوجود نمی اور گرمی میں اضافہ ہوگا، جس سے لوگوں کو حبس کا سامنا کرنا پڑ سکتا ہے۔ محکمۂ موسمیات کے مطابق دہلی میں زیادہ سے زیادہ درجہ حرارت 38 ڈگری سیلسیس تک پہنچ سکتا ہے اور 13 و 14 جولائی کو بھی موسم تقریباً اسی نوعیت کا رہے گا۔اتر پردیش اور بہار میں مون سون کا سب سے زیادہ اثر دیکھنے کو مل رہا ہے۔ لکھنؤ، کانپور، میرٹھ، آگرہ، رائے بریلی، گورکھپور اور کشی نگر سمیت کئی اضلاع میں 70 کلومیٹر فی گھنٹہ کی رفتار سے ہوائیں چلنے اور شدید بارش کی پیش گوئی کی گئی ہے۔ بہار کے پٹنہ میں درجہ حرارت تقریباً 33 ڈگری سیلسیس رہنے کا امکان ہے، جبکہ مظفرپور، دربھنگہ، سمستی پور، ویشالی اور کشن گنج میں موسلا دھار بارش اور 60 کلومیٹر فی گھنٹہ کی رفتار سے ہوائیں چلنے کا الرٹ جاری کیا گیا ہے۔

پہاڑی ریاستوں میں بھی صورتحال تشویشناک بنی ہوئی ہے۔ اتراکھنڈ کے دہرادون، نینی تال، چمولی اور پتھورا گڑھ سمیت آٹھ اضلاع میں 14 جولائی تک شدید بارش کا امکان ظاہر کیا گیا ہے۔ محکمۂ موسمیات نے لینڈ سلائیڈنگ اور اچانک سیلاب کے خدشے کے پیش نظر مقامی باشندوں اور سیاحوں کو انتہائی احتیاط برتنے کا مشورہ دیا ہے۔ ہماچل پردیش کے شملہ، منالی، کلو اور منڈی میں بھی شدید بارش اور تیز ہواؤں کی پیش گوئی کی گئی ہے، جبکہ منالی میں درجہ حرارت کم ہو کر زیادہ سے زیادہ 16 اور کم سے کم 11 ڈگری سیلسیس رہ سکتا ہے۔ادھر مغربی بنگال میں بھی مون سون پوری شدت کے ساتھ سرگرم ہے۔ کولکاتا اور جنوبی بنگال کے متعدد اضلاع میں آئندہ چار سے پانچ دن تک اچھی بارش متوقع ہے، جبکہ نادیہ، بانکورا اور پورب بردھمان میں اورنج الرٹ جاری کیا گیا ہے۔ دوسری جانب تمل ناڈو کے چنئی سمیت کئی علاقوں میں ہلکی بارش اور تقریباً 50 کلومیٹر فی گھنٹہ کی رفتار سے ہوائیں چلنے کا امکان ہے۔ انتظامیہ نے شہریوں سے غیر ضروری سفر سے گریز کرنے اور خراب موسم کے دوران محفوظ مقامات پر رہنے کی اپیل کی ہے۔

بھارت ایکسپریس اردو