Waqf Amendment Bill in Lok Sabha: وقف ترمیمی بل سے متعلق پارلیمنٹ میں ہنگامہ، اسدالدین اویسی نے پھاڑ دی کاپی، کہا- یہ غیرآئینی

Waqf Amendment Bill: آل انڈیا مجلس اتحاد المسلمین (اے آئی ایم آئی ایم) کے سربراہ اسدالدین اویسی لوک سبھا میں وقف ترمیمی بل سے متعلق مرکزی حکومت پر جم کرتنقید کی۔ انہوں نے بل کی مخالفت کرتے ہوئے کہا کہ ملک میں مسلمانوں کے ساتھ نا انصافی ہو رہی ہے اور یہ آرٹیکل 26، 25 کی خلاف ورزی ہے۔ انہوں نے کہا کہ مساجد اور مدارس کو نشانہ بنایا جارہا ہے۔ لوک سبھا میں انہوں نے بل کی کاپی پھاڑتے ہوئے یہ بات کہی۔

‘میں گاندھی جی کی طرح یہ بل پھاڑتا ہوں’

اسدالدین اویسی نے کہا کہ “گاندھی جی کے سامنے جب ایک ایسا قانون لایا گیا، جوان کو قبول نہیں تھا تو انہوں نے کہا کہ میں اسے قانون کو مانتا نہیں ہوں، اس کو پھاڑتا ہوں تو میں بھی گاندھی جی کی طرح قانون کوپھاڑتا ہوں، اس کے بعد دوپیج کے درمیان جس میں اسٹیپرلگا ہوا تھا، وہ الگ الگ کردیئے۔”

اویسی نے کہا کہ حکومت یہ جوقانون بنا رہی ہے وہ آرٹیکل 26 کی خلاف ورزی ہے۔ بی جے پی ملک میں جھگڑے پیدا کرنا چاہتی ہے۔ کل کو کلکٹراور ڈی ایم کہے گا یہ حکومت کی جائیداد ہے اور وہاں پوسٹرچسپاں کردے گا۔ مساجد بند ہوجائیں گی۔ جب یہ بل پاس ہوجائے گا تو ملک میں قدیمی مندروں کی حفاظت ہوگی، لیکن مساجد کی نہیں ہوگی۔ انہوں نے مزید کہا کہ دہلی میں 172 پراپرٹی اے ایس آئی کے کنٹرول میں ہیں۔

امت شاہ نے کہا- قانون سبھی کو قبول کرنا ہوگا

اس سے پہلے مرکزی وزیرداخلہ امت شاہ نے لوک سبھا میں اپوزیشن پرالزام لگایا کہ وہ وقف پر مجوزہ قانون نہیں ماننے کی دھمکی دے رہے ہیں، لیکن یہ پارلیمنٹ کے ذریعہ منظورکیا گیا قانون ہوگا اوراسے سبھی کو قبول کرنا پڑے گا۔ انہوں نے کہا کہ ووٹ بین کی سیاست کے لئے یہ ڈرپھیلایا جا رہا ہے کہ وقف بل مسلمانوں کے مذہبی معاملات اوران کے ذریعہ عطیہ کی گئی جائیدادوں میں دخل ہے۔

بھارت ایکسپریس اردو-