Kerala CM Oath Ceremony: وی ڈی ستیشن بنے کیرالہ کے نئے وزیر اعلیٰ، 20 رکنی کابینہ بھی شامل ،راہل گاندھی، پرینکا اور کھڑگے نے حلف برداری تقریب میں کی شرکت

نئی دہلی : کیرالہ میں کانگریس کی قیادت والے یونائیٹڈ ڈیموکریٹک فرنٹ (یو ڈی ایف) کی نئی حکومت نے پیر کے روز باضابطہ طور پر اقتدار سنبھال لیا۔ وی ڈی ستیشن نے کیرال کے وزیر اعلیٰ کے طور پر حلف اٹھایا، جب کہ ان کے ساتھ 20 رکنی وزارتی کونسل نے بھی اپنے عہدوں کا حلف لیا۔ حلف برداری کی تقریب صبح 10 بجے ترواننت پورم کے سینٹرل اسٹیڈیم میں منعقد ہوئی، جہاں سیاسی لیڈروں، سرکاری حکام اور عوام کی بڑی تعداد موجود تھی۔وی ڈی ستیشن کی حلف برداری تقریب میں کانگریس صدر ملکارجن کھڑگے، لوک سبھا میں اپوزیشن لیڈر راہل گاندھی اور کانگریس جنرل سکریٹری پرینکا گاندھی بھی خصوصی طور
پر شریک ہوئیں۔

اس موقع پر کانگریس اور اتحادی جماعتوں کے کارکنان میں زبردست جوش و خروش دیکھا گیا۔وی ڈی ستیشن نے اتوار کو گورنر راجندر وشوناتھ آرلیکر سے ملاقات کے بعد نئی کابینہ کی حتمی فہرست پیش کی تھی۔ اس فہرست کو یو ڈی ایف اتحاد میں شامل جماعتوں کے درمیان تفصیلی مشاورت کے بعد تیار کیا گیا۔

وزارتوں کی تقسیم

وزیر اعلیٰ وی ڈی ستیشن اپنے پاس مالیات کی اہم وزارت بھی رکھیں گے۔ کانگریس کے سینئر لیڈر رمیش چنیتھلا کو محکمہ داخلہ کا قلمدان دیا گیا ہے۔نئی کابینہ میں کانگریس کے کئی سینئر لیڈرشامل کیے گئے ہیں، جن میں کے مرلی دھرن اور سنی جوزف نمایاں ہیں۔ اس کے علاوہ اے پی انیل کمار، پی سی وشنو نادھ، روزی ایم جان، بندھو کرشنا، ایم لیجو، ٹی صدیق اور او جے جینیش بھی کابینہ کا حصہ ہوں گے۔کانگریس کے حصے سے کے اے تلسی کو بھی وزارت دی گئی ہے اور وہ پارٹی کی جانب سے شامل دو خواتین وزراء میں سے ایک ہوں گی۔

آئی یو ایم ایل کو پانچ وزارتیں

اتحادی جماعت انڈین یونین مسلم لیگ (آئی یو ایم ایل) کی نمائندگی پی کے کنہالی کٹی، پی کے بشیر، این شمس الدین، کے ایم شاجی اور عبدالغفور کریں گے۔

اتحادی جماعتوں کو بھی نمائندگی

یو ڈی ایف اتحاد کی دیگر جماعتوں کے رہنماؤں کو بھی کابینہ میں شامل کیا گیا ہے۔ ان میں سی ایم پی کے سی پی جان، آر ایس پی کے شیبو بے بی جان، کیرالہ کانگریس (جیکب) دھڑے کے انوپ جیکب اور کیرالہ کانگریس (جوزف) دھڑے کے مونس جوزف شامل ہیں۔اتحاد نے تروونچور رادھا کرشنن کو کیرال اسمبلی کا اسپیکر نامزد کیا ہے، جبکہ شانیمول عثمان ڈپٹی اسپیکر کے عہدے پر خدمات انجام دیں گی۔سیاسی مبصرین کے مطابق وی ڈی ستیشن کی قیادت میں بننے والی یہ حکومت کیرال کی سیاست میں ایک نئے دور کی شروعات سمجھی جا رہی ہے، جس سے عوام کو بہتر حکمرانی اور ترقیاتی اقدامات کی امیدیں وابستہ ہیں۔

بھارت ایکسپریس اردو