اتراکھنڈ: پتھورا گڑھ میں سواریوں سے بھری گاڑی 150 فٹ گہری کھائی میں گری، 7 افراد ہلاک

اتراکھنڈ کے پتھورا گڑھ میں سواریوں سے بھری گاڑی 150 فٹ گہری کھائی میں گرگئی۔

اتراکھنڈ کے پتھورا گڑھ ضلع میں ایک المناک حادثہ پیش آیا ہے۔ یہاں موانی سے بکٹا جانے والی ٹیکسی بے قابو ہوکر150 میٹرگہری کھائی میں جاگری۔ یہ حادثہ سونی پل کے قریب پیش آیا۔ موصولہ اطلاعات کے مطابق ٹیکسی میں کل 13 افراد سوارتھے، جن میں سے 7 افراد کی موقع پرہی موت ہوگئی، جبکہ دیگرشدید زخمی ہیں۔

دوسری جانب حادثے کی اطلاع ملتے ہی پتھورا گڑھ ضلع کی پولیس انتظامیہ کی ٹیم موقع پرپہنچ گئی اورامدادی کارروائی شروع کی۔ زخمیوں کو کھائی سے نکال کرابتدائی طبی امداد کے لیے اسپتال بھیجاجا رہا ہے۔ حادثے کی وجوہات کی تحقیقات کی جا رہی ہیں۔ ابتدائی طور پریہ شبہ ہے کہ ٹیکسی بے قابوہوگئی۔

اطلاعات کے مطابق، یہ حادثہ منگل کی شام تقریباً 5 بجے ضلع ہیڈکوارٹرسے تقریباً 52 کلومیٹردورپیش آیا۔ ٹیکسی کے کھائی میں گرتے ہی کافی چیخ وپکارمچ گئی۔ اس حادثے میں سات افراد اپنی جان سے ہاتھ دھوبیٹھے ہیں۔ ساتھ ہی دیگرافراد شدید زخمی ہیں۔ مقامی لوگوں اور پولیس کی مدد سے ریسکیوآپریشن جاری ہے۔

وزیراعلیٰ پشکرسنگھ دھامی نے حادثے پرافسوس کا اظہارکیا

اتراکھنڈ کے وزیراعلی پشکر سنگھ دھامی نے بھی حادثے پرافسوس کا اظہارکیا۔ انہوں نے پوسٹ کیا، “ضلع پتھورا گڑھ کے موانی علاقے میں ایک گاڑی کے حادثے کی انتہائی افسوسناک خبرملی۔ میں خدا (ایشور) سے دعا کرتا ہوں کہ وہ حادثے میں ہلاک ہونے والوں کی روحوں پر رحم کرے اور سوگوارخاندان کو یہ درد برداشت کرنے کی طاقت دے۔ میں نے ضلعی انتظامیہ کوزخمیوں کے مناسب علاج کی ہدایت کی ہے۔ میں دعا کرتا ہوں کہ تمام افراد کی جلد صحت یابی ہو۔”