UPI enters Israel: وزیراعظم کے دورۂ کے بعد اسرائیل میں یو پی آئی کی شروعات، سرحد پار ڈیجیٹل لین دین ہوگا تیز، اہم معاہدے پر دستخط

تل ابیب: بھارت اور اسرائیل نے جمعرات کے روز یو پی آئی کے سرحد پار (کراس بارڈر) استعمال کے لیے ایک اہم معاہدے پر دستخط کیے۔ اس اقدام سے دونوں ممالک کے درمیان ڈیجیٹل اور مالی شراکت داری کو مزید تقویت ملے گی۔ اس شراکت داری کے تحت یو پی آئی کو اسرائیل کے مقامی ادائیگی نظام سے منسلک کیا جائے گا، جس سے ڈیجیٹل لین دین زیادہ تیز، محفوظ اور کم لاگت والے ہوں گے۔ اپنے اسرائیل دورے کے دوسرے اور آخری دن معاہدے کے بعد وزیرِ اعظم نریندر مودی نے کہا: ’’مجھے خوشی ہے کہ اسرائیل میں یو پی آئی کے استعمال کے لیے ایک معاہدہ طے پا گیا ہے۔‘‘

کاروبار کو ہوگا فائدہ

اس اقدام سے دونوں ممالک کے کاروباری اداروں کو آسان سرحد پار ادائیگیوں کا فائدہ ہوگا، جس سے لین دین کی لاگت اور تصفیے کا وقت کم ہونے کی امید ہے۔ وزیراعظم نے مزید کہا: ’’ہم نے کریٹیکل اینڈ ایمرجنگ ٹیکنالوجیز پارٹنرشپ قائم کرنے کا فیصلہ کیا ہے۔ اس سے مصنوعی ذہانت (اے آئی)، کوانٹم ٹیکنالوجیز اور اہم معدنیات جیسے شعبوں میں تعاون کو نئی رفتار ملے گی۔‘‘ انہوں نے مزید کہا کہ دونوں ممالک شہری جوہری توانائی اور خلائی شعبے میں تعاون کو آگے بڑھائیں گے، مستقبل کے لیے تیار زرعی حل تیار کریں گے اور مثالی دیہات کی تعمیر پر بھی کام کریں گے۔

یو پی آئی ماڈل کی عالمی پذیرائی

یونیفائیڈ پیمنٹس انٹرفیس (یو پی آئی) ماحولیاتی نظام نے ثابت کیا ہے کہ شمولیت اور وسعت ایک ساتھ چل سکتے ہیں اور ایک عوامی، باہمی طور پر قابل عمل ماڈل نجی نیٹ ورکس سے بہتر ہو سکتا ہے۔ فی الحال یو پی آئی کا استعمال آٹھ سے زائد ممالک میں ہو رہا ہے، جن میں متحدہ عرب امارات، سنگاپور، بھوٹان، نیپال، سری لنکا، فرانس، ماریشس اور قطر شامل ہیں۔ بھارت کی وزارت خزانہ کے تحت کرائے گئے ایک آزاد مطالعے کے مطابق، یو پی آئی بھارت میں ادائیگی کا سب سے پسندیدہ ذریعہ بن چکا ہے، جو مجموعی ڈیجیٹل لین دین کا تقریباً 57 فیصد ہے، جبکہ نقد ادائیگیوں کا حصہ 38 فیصد رہ گیا ہے۔ استعمال میں آسانی اور فوری رقم کی منتقلی کی سہولت اس کی مقبولیت کی بڑی وجوہات سمجھی جاتی ہیں۔ 65 فیصد سے زیادہ صارفین روزانہ اس مقامی پلیٹ فارم پر متعدد لین دین کرتے ہیں۔ اسرائیل میں یو پی آئی کی شمولیت کو ڈیجیٹل معیشت کے فروغ اور بھارت۔اسرائیل مالی تعلقات میں ایک اہم سنگِ میل قرار دیا جا رہا ہے۔

بھارت ایکسپریس اردو۔