Home Minister Amit Shah: ’اشوک سنگھل کی جنم صدی کا شاندار آغاز‘، بھارت منڈپم میں مرکزی وزیر داخلہ امت شاہ کریں گے خطاب

نئی دہلی: وشو ہندو پریشد (VHP) کے سابق کارگزار صدر اور رام مندر تحریک کے اہم لیڈروں میں شمار ہونے والے اشوک سنگھل کی جنم صدی کے موقع پر آج، 27 ستمبر کو نئی دہلی کے معروف بھارت منڈپم میں شاندار افتتاحی تقریب منعقد کی جا رہی ہے۔ مرکزی وزیر داخلہ و تعاون امت شاہ اس پروگرام کے مہمانِ خصوصی ہوں گے اور شام 4 بجے تقریب سے خطاب کریں گے۔ تقریب میں راشٹریہ سویم سیوک سنگھ (RSS) کے سرکاریہ واہ دتاتریہ ہوسبولے اور مہامنڈلیشور سوامی پرمانند گری مہاراج کی بھی خصوصی شرکت ہوگی۔

کاشی اور متھرا کے مطالبے کو آگے بڑھانے کا اعلان

وی ایچ پی کے بین الاقوامی صدر آلوک کمار نے میڈیا کو بتایا کہ 27 ستمبر سے شروع ہونے والی سال بھر کی تقریبات میں اشوک سنگھل کی زندگی، ان کی فکری بصیرت اور ملک کے لیے ان کی خدمات کو یاد کیا جائے گا۔ آلوک کمار کے مطابق ایودھیا میں رام مندر سے متعلق طویل عرصے کی جدوجہد کے بعد اب اس سال کے دوران کاشی اور متھرا سے متعلق سنگھل کے منصوبوں کو بھی آگے بڑھایا جائے گا۔ اس کے علاوہ مبینہ غیر قانونی مذہبی تبدیلیوں پر پابندی، ’گھر واپسی‘، مندروں کو سرکاری کنٹرول سے آزاد کرنے اور سماجی ہم آہنگی جیسے موضوعات پر ملک اور بیرونِ ملک ہزاروں مذاکروں اور اجلاسوں کا انعقاد کیا جائے گا۔

’شری رام استھمبھ‘ کا ڈیجیٹل اجرا

جنم صدی کی افتتاحی تقریب میں اشوک سنگھل کی زندگی، ان کی روحانی تربیت اور رام جنم بھومی تحریک میں ان کے کردار پر مبنی خصوصی نمائش بھی لگائی جائے گی۔ اس کے علاوہ ’مریادا پرشوتم شری رام کے دیو پدچنہ‘ کے موضوع پر ایک خصوصی کافی ٹیبل بک جاری کی جائے گی اور ’شری رام استھمبھ‘ کا ڈیجیٹل اجرا بھی ہوگا۔ ان ستونوں کے ذریعے بھگوان شری رام کی زندگی، ان کے بن باس کے راستے اور مختلف روحانی مقامات سے وابستہ یادوں کو لوگوں تک پہنچانے کی کوشش کی جائے گی۔

معذور افراد کے لیے خدمت کیمپ بھی شروع ہوگا

اشوک سنگھل فاؤنڈیشن اور وشو ہندو پریشد کے تعاون سے ایودھیا کے کار سیوک پورم میں معذور افراد کے لیے مصنوعی اعضا اور معاون آلات کی تقسیم کے کیمپ کا آغاز بھی 27 ستمبر سے کیا جا رہا ہے۔ یہ خدمت پروگرام یکم اکتوبر 2026 تک پانچ دن جاری رہے گا، جس کے ذریعے ضرورت مند افراد کو مصنوعی اعضا اور دیگر ضروری معاون آلات فراہم کیے جائیں گے۔ وی ایچ پی کے مطابق اس ملک گیر مہم کا مقصد اشوک سنگھل کے خدمت، تنظیم اور سنسکار سے متعلق پیغام کو ملک اور دنیا کے مختلف حصوں تک پہنچانا ہے۔

بھارت ایکسپریس اردو۔