Khalistan movement: Two accused sentenced to five years in prison: خالصتان تحریک کو زندہ کرنے کے الزام میں دو لوگ قصوروار، این آئی اے کی خصوصی عدالت نے دوںوں کو پانچ سال قید کی سنائی سزا

نیشنل انویسٹی گیشن ایجنسی (این آئی اے) کی ایک خصوصی عدالت نے بدھ کو خالصتان تحریک کو بحال کرنے کی سازش رچنے کے الزام میں دو ملزمان کو پانچ پانچ سال قید کی سزا سنائی  ہے۔ دونوں ملزمان کو تعزیرات ہند اور مہاراشٹر پولیس ایکٹ کے علاوہ غیر قانونی سرگرمیاں (روک تھام) ایکٹ کے متعلقہ سیکشن کے تحت مجرم قرار دیا گیا ہے۔

ہرپال سنگھ اور گرجیت سنگھ نجر نے جرم قبول کیا

مقدمے کی سماعت کے دوران، ہرپال سنگھ عرف راجو اور گرجیت سنگھ نجر نے این آئی اے کے خصوصی جج اے ایم پاٹل کے سامنے اپنا جرم قبول کیا۔ این آئی اے کورٹ میں سزا سنائے جانے سے پہلے دونوں ملزمان نے جج سے یہ بھی درخواست کی کہ انہیں کم سے کم سزا دی جائے کیونکہ وہ اپنے خاندان کا واحد کمانے والا فرد ہے۔ جس کے بعد عدالت نے دونوں کو پانچ پانچ سال قید کی سزا سنائی ہے۔

سکھ عسکریت پسندی کو زندہ کرنے کی سازش

بتا دیں کہ ہرپال کی گرفتاری کے ساتھ مہاراشٹر کے انسداد دہشت گردی دستے نے پہلی بار 2 دسمبر 2018 کو مقدمہ درج کیا تھا۔ لیکن بعد میں کیس این آئی اے کے حوالے کر دیا گیا تھا۔ نیشنل انویسٹی گیشن ایجنسی نے دعویٰ کیا کہ ہرپال اور گرجیت نے دو دیگر گرفتار ملزمان کے ساتھ مل کر ایک الگ ملک خالصتان بنانے کے مقصد سے سکھ عسکریت پسندی کو زندہ کرنے کی سازش کی تھی۔

سوشل میڈیا پر کالعدم تنظیم سے متعلق ویڈیوز پوسٹ کیے

دونوں سزا یافتہ ملزمان نے مقتول دہشت گردوں جرنیل سنگھ بھنڈرانوالے اور جگتار سنگھ ہوارا (پنجاب کے سابق وزیر اعلیٰ بینت سنگھ کے قتل کے مجرم) کی بھی حمایت کی تھی۔ سوشل میڈیا پر ان کی حمایت میں پیغامات، آپریشن بلیو اسٹار اور کالعدم تنظیم ببر خالصہ انٹرنیشنل سے متعلق ویڈیوز پوسٹ کیے ہیں۔ پبلک پروسیکیوشن  نے کہا کہ کمزور سکھ نوجوانوں کو خالصتان تحریک میں شامل ہونے کی ترغیب دی جاتی ہے۔ این آئی اے نے کہا کہ اہم سازش کار گرجیت سنگھ کچھ سالوں سے قبرص (Cyprus) میں رہ رہا تھا۔ تاہم دیگر دو ملزمان کے خلاف ٹرائل جاری رہے گا۔

بھارت ایکسپریس۔