TIET Scientists Develop Indigenous Device: ’میک ان انڈیا‘ آلہ بنے گا کینسر کا قاتل، تھاپرانسٹی ٹیوٹ کے سائنس دانوں نے بھارت ایکسپریس کو بتائی انقلابی تکنیک

بھارت میں کینسر کے علاج کے میدان میں ایک بڑی اور تاریخی پیش رفت سامنے آئی ہے۔ پنجاب کے شہر پٹیالہ میں واقع تھاپر انسٹی ٹیوٹ آف انجینئرنگ اینڈ ٹیکنالوجی (TIET) کے سائنس دانوں نے ایک ایسا دیسی ہائپر تھرمیا ایپلی کیٹر تیار کیا ہے جو کینسر کے علاج میں انقلابی ثابت ہو سکتا ہے۔ یہ جدید طبی آلہ حکومت ہند کی وزارت الیکٹرانکس و انفارمیشن ٹیکنالوجی (MeitY) کے زیرسرپرستی ایک اہم تحقیقی منصوبے کے تحت تیار کیا گیا ہے۔

آتم نربھر بھارت کی جانب مضبوط قدم

اس منصوبے کے مرکزی محقق ڈاکٹر راجیش کھنہ اور شریک محقق ڈاکٹر مینک کمار رائے ہیں۔ یہ ٹیم ملک میں پہلی بار سُپرفیشل کینسر کے علاج کے لیے مکمل طور پر مقامی سطح پر تیار کردہ ہائپر تھرمیا سسٹم پر کام کر رہی ہے، جو میڈیکل ٹیکنالوجی کے شعبے میں آتم نربھر بھارت کی سمت ایک مضبوط قدم مانا جا رہا ہے۔

ہائپر تھرمیا تکنیک کیسے کام کرتی ہے؟

ہائپر تھرمیا تکنیک کے تحت کینسر سے متاثرہ حصے کو ایک مخصوص اور کنٹرول شدہ درجۂ حرارت تک گرم کیا جاتا ہے، جس سے کینسر کے خلیات کمزور ہو کر تباہ ہونے لگتے ہیں۔ یہ طریقہ علاج نہ صرف خود مؤثر ہے بلکہ ریڈیو تھراپی اور کیموتھراپی کے اثر کو بھی نمایاں طور پر بڑھا دیتا ہے۔

بھارت ایکسپریس سے خصوصی گفتگو

سائنس دانوں نے بھارت ایکسپریس نیوز نیٹ ورک سے خصوصی گفتگو میں بتایا کہ یہ منصوبہ اب اپنے آخری مرحلے میں داخل ہو چکا ہے۔ جلد ہی اس آلے کو گورنمنٹ میڈیکل کالج (GMC)، پٹیالہ منتقل کیا جائے گا، جہاں انسانی بافتوں پر اس کے کلینیکل ٹرائلز کیے جائیں گے۔ یہ تجربات معروف کینسر ماہر ڈاکٹر راجا بینی پال کی نگرانی میں ہوں گے۔

ملٹی انسٹی ٹیوشنل ریسرچ کا نتیجہ

اس کثیر ادارہ جاتی تحقیقی منصوبے میں ناناوتی اسپتال کے سینئر آنکولوجسٹ ڈاکٹر ناگ راج بھی شامل ہیں، جو کلینیکل سطح پر اس ٹیکنالوجی کو لیبارٹری سے مریضوں تک پہنچانے میں اہم کردار ادا کر رہے ہیں۔

’میک اِن انڈیا‘ کو ملے گی نئی طاقت

ڈاکٹر راجیش کھنہ اور ڈاکٹر مینک رائے نے اعتماد ظاہر کیا کہ یہ دیسی ٹیکنالوجی نہ صرف میک ان انڈیا مہم کو تقویت دے گی بلکہ مستقبل میں بھارت کو میڈیکل ڈیوائس کے شعبے میں خود کفیل بنانے میں بھی اہم کردار ادا کرے گی۔

ادارہ جاتی قیادت کی ستائش

اس موقع پر تھاپر انسٹی ٹیوٹ کے وائس چانسلر اور رجسٹرار نے منصوبے کی پیش رفت پر اطمینان کا اظہار کرتے ہوئے کہا کہ یہ کامیابی ادارے کی مضبوط تحقیقی روایت، بین شعبہ جاتی تعاون اور سماج کے لیے فائدہ مند اختراعات کے تئیں وابستگی کی عکاس ہے۔ ساتھ ہی، سائنس دان VLSI ڈیزائن اور مائیکروویو انجینئرنگ جیسے جدید شعبوں میں بھی مسلسل تحقیق کر رہے ہیں۔

بھارت ایکسپریس اردو۔