Three landslides hit Wayanad district: گہری نیند میں سورہے تھے لوگ، آدھی رات کو تین بار لینڈ سلائیڈنگ اور پھر 90 سے زیادہ لوگوں کی موت،سنبھلنے کا بھی نہیں ملا موقع

وائناڈ میں آدھی رات کو تین مٹی کے تودے گرنے سے ہر طرف تباہی مچ گئی۔ مرنے والوں کی تعداد 90 سے تجاوز کر گئی ہے۔ مرکزی حکومت نے مرنے والوں اور زخمیوں کے لیے مدد کا اعلان کیا ہے۔ ایم پی راہل گاندھی اور پرینکا گاندھی وایناڈ جا سکتے ہیں، ایسی بھی خبریں آرہی ہیں۔واضح رہے کہ  لینڈ سلائیڈنگ کے وقت لوگ اپنے گھروں میں سو رہے تھے۔ حالات اتنے خراب ہوگئے کہ مکینوں کو سنبھلنے کا موقع بھی نہیں ملا۔ اس وقت  بھی بڑی تعداد میں لوگ لاپتہ ہیں۔قریب 116 لوگوں کے زخمی ہونے کی بھی خبر ہے۔ این ڈی آر ایف کی ٹیمیں موقع پر موجود ہیں اور بچاؤ اور راحت کا کام کر رہی ہیں۔ کیرالہ حکومت نے آج اور کل ریاست میں سرکاری سوگ کا اعلان کیا ہے۔

وہیں دوسری جانب موسلادھار بارش کا سلسلہ تاحال جاری ہے جس کی وجہ سے امدادی کاموں میں مشکلات کا سامنا ہے۔ ملاپورم میں چلیار ندی سے کم از کم 15 لاشیں برآمد ہوئی ہیں اور بہت سے لوگوں کے بہہ جانے کا خدشہ ہے۔پولیس کا کہنا ہے کہ دریا سے مزید لاشیں نکالی جا رہی ہیں۔ کئی مکانات، دکانیں اور گاڑیاں ملبے تلے دب گئی ہیں۔ یہاں تک کہ اس مقام کی طرف جانے والا ایک پل بھی بہہ گیا ہے۔ ان تمام حالات کے درمیان بچاؤ کا کام بہت مشکل ہو گیا ہے۔کیرالہ کے وزیر اعلیٰ پنارائی وجین نے یقین دلایا ہے کہ عارضی پلوں کی تعمیر، ہیلی کاپٹر کے ذریعے لوگوں کو نکالنے اور آفت کے مقام پر ضروری انتظامات کرنے کے لیے فوج کی مدد لی جارہی ہے۔

ادھر وزیر اعظم نریندر مودی نے ایک ٹویٹ میں کہا کہ حکومت ہند ہر ممکن مدد بھیجنے کی کوشش کر رہی ہے اور اس نے وزیر اعظم ریلیف فنڈ کے ذریعے مرنے والوں کے لواحقین کو دو دو لاکھ روپے کی امداد فراہم کرنے کا اعلان کیا ہے۔ریاستی حکومت کا کہنا ہے کہ صورتحال بدستور سنگین ہے۔ اس کی بڑی وجہ ایک رات میں تین بار لینڈ سلائیڈنگ کا ہونا ہے۔ ملبہ اتنا زیادہ ہے کہ امدادی کاموں میں مصروف ٹیموں کے لیے حرکت کرنا بھی مشکل ہو گیا ہے۔ محکمہ موسمیات نے پیش گوئی کی ہے کہ علاقے میں بارش کا سلسلہ فی الحال جاری رہے گا۔کیرالہ کے وزیر اعلیٰ پنارائی وجین نے اعلان کیا کہ صورتحال سے نمٹنے اور جاری امدادی سرگرمیوں کی نگرانی کے لیے پانچ وزراء کا ایک وفد وایناڈ بھیجا گیا ہے۔ وزراء سے کہا گیا ہے کہ وہ فوری طور پر امدادی کاموں کی اطلاع دیں اور بے گھر لوگوں کو ریلیف کیمپوں میں بھیجیں۔

بھارت ایکسپریس۔