Lemongrass is one of the most useful aromatic herbs: لیمن گراس-چھوٹی سی گھاس مگر صحت کے لیے بے شمار فوائد کا خزانہ

نئی دہلی :صدیوں سے آیوروید میں مختلف جڑی بوٹیوں اور قدرتی پودوں کو علاج کے لیے استعمال کیا جاتا رہا ہے۔ جدید دور میں انہی روایتی پودوں کو سائنسی ناموں اور نئی پیکنگ کے ساتھ بازار میں پیش کیا جا رہا ہے۔ انہی مفید پودوں میں ایک اہم نام لیمن گراس کا ہے، جو آج کل صحت سے آگاہ افراد اور فٹنس سے وابستہ لوگوں میں تیزی سے مقبول ہو رہا ہے، حالانکہ اس کا استعمال قدیم زمانے سے آیوروید میں کیا جاتا رہا ہے۔ لیمن گراس ایک خوشبودار اور طبی خصوصیات سے بھرپور گھاس ہے، جسے آیوروید میں ’’بھُوسترن‘‘ کہا جاتا ہے۔ یہ جسم کے تین بنیادی مزاج یعنی وات، پِت اور کَف کو متوازن رکھنے میں مدد دیتی ہے۔ اس کے استعمال سے جوڑوں اور پٹھوں کے درد میں آرام ملتا ہے۔ اس کا ذائقہ ہلکا کڑوا اور تیکھا ہوتا ہے، مگر تاثیر ٹھنڈی سمجھی جاتی ہے، جو اعصاب کو سکون پہنچانے اور اعصابی نظام کو مضبوط بنانے میں مددگار ثابت ہوتی ہے۔

لیمن گراس کھانسی، بخار، ملیریا، پھیپھڑوں کے انفیکشن، آنکھوں اور مسوڑھوں کی سوجن سمیت خون کی صفائی سے متعلق مسائل میں بھی مفید مانی جاتی ہے۔ اس کا تیل نظامِ ہاضمہ کو بہتر بناتا ہے اور متلی، سر درد اور خواتین کے ماہواری سے متعلق تکالیف میں راحت فراہم کرتا ہے۔ جلدی مسائل میں لیمن گراس کا لیپ دوا کی طرح اثر دکھاتا ہے اور جلد کو صحت مند بنانے میں مدد دیتا ہے۔ استعمال کے طریقوں کی بات کی جائے تو روزانہ تازہ لیمن گراس کا جوس پینا جسم سے زہریلے مادوں کے اخراج میں مددگار ہوتا ہے۔ اس کے علاوہ لیمن گراس کی چائے بھی ایک بہترین متبادل ہے، جو کیفین والے مشروبات کی جگہ صحت بخش انتخاب بن سکتی ہے۔

ذہنی دباؤ، بے خوابی اور تھکن دور کرنے کے لیے لیمن گراس آئل نہایت مفید سمجھا جاتا ہے۔ اسے ماتھے یا چہرے پر ہلکی مالش کے ساتھ استعمال کیا جائے تو سکون اور تازگی کا احساس پیدا ہوتا ہے۔ اس طرح لیمن گراس نہ صرف خوراک بلکہ قدرتی علاج اور حسن و صحت دونوں کے لیے ایک مؤثر نعمت ثابت ہوتی ہے۔

بھارت ایکسپریس اردو