Eid Milad-Un-Nabi: مہاراشٹر حکومت نے کیا اعلان، جمعہ کے روز ہوگی عید میلاد النبیﷺ کی تعطیل

ممبئی: مہاراشٹر حکومت نے مسلم رہنماؤں کی درخواست پر 29 ستمبر کو عید میلاد النبی کی تعطیل کا اعلان کیا ہے۔ اس سال، اننت چتردشی اور دس روزہ گنیش اتسو کا آخری دن 28 ستمبر کو ہے اور اسی دن عید میلاد ہے، یہ تہوار پیغمبر اسلام محمد ﷺ کی یوم پیدائش کے طور پر منایا جاتا ہے۔

ایک بیان کے مطابق ممبئی اور دیگر مقامات پر اننت چتردشی اور عید میلاد کے موقع پر جلوس نکالے جاتے ہیں اور اس کے پیش نظر مقامی مسلم تنظیموں کے نمائندوں نے وزیر اعلیٰ ایکناتھ شندے سے اس کا حل نکالنے کی درخواست کی تھی۔

شندے نے ایک بیان میں کہا، “وفد نے درخواست کی ہے کہ جمعہ 29 ستمبر کو تعطیل کا اعلان کیا جائے تاکہ پولیس دونوں دنوں (28 اور 29 ستمبر) کو جلوس کے انتظامات کر سکے۔ ریاستی حکومت نے جمعہ کو سرکاری تعطیل کا اعلان کرنے کا بھی فیصلہ کیا ہے۔ اس اعلان کے بعد ریاست میں جمعرات اور جمعہ کی تعطیلات اور 2 اکتوبر کو مہاتما گاندھی جینتی کی تعطیل کے بعد ویک اینڈ ہوگا۔

بھارت ایکسپریس۔