Tejashwi Yadav on Bihar Govt: بہار میں غنڈہ راج چل رہا ہے،مجرموں میں کوئی خوف نہیں ہے،سب کچھ بھگوان بھروسے چل رہا ہے۔تیجسوی یادو

لوک سبھا انتخابات کے بیچ گزشتہ چند دنوں میں بہار کے کئی مقامات سے انفرادی قتل کی خبریں آئی ہیں ، عام سڑک سے کالج کے کیمپس تک قتل  کے واقعات پیش آرہے ہیں ۔ یہی وجہ ہے کہ بہار کے سابق ڈپٹی سی ایم تیجسوی یادو نے کہا کہ بہار میں غنڈہ راج چل رہا ہے ، مجرموں میں کوئی خوف نہیں ہے۔ سب کچھ بھگوان بھروسے چل رہا ہے۔ تیجسوی یادو نے میڈیا اہلکاروں سے بات کرتے ہوئے کہا کہ این ڈی اے کی بہار سرکار میں غنڈہ راج ساتویں آسمان پر ہے۔ ابھی کچھ دن پہلے مسوڈھی میں سورو پٹیل کا قتل  ہوا تھا،چھپرا میں چندن رائے کو قتل کردیا گیا اور کل پٹنہ یونیورسٹی میں طالب علم ہرش راج کا قتل کیا گیا ۔ بہار میں لاء اینڈرآرڈر نام کی کوئی چیز نہیں رہی، یہاں سب کچھ بھگوان بھروسے چل رہا ہے۔

واضح رہے کہ ہرش راج کو پیر کو کالج کیمپس میں کچھ لڑکوں نے پیٹ پیٹ کر ہلاک کر دیا۔ ہرش کے والد صحافی ہیں۔ اکلوتے بیٹے کی لاش دیکھ کر والدین دھاڑیں مار مار کر رو پڑے۔ پورے خاندان کی حالت خراب ہے۔ ہرش راج کے دادا ریٹائرڈ ٹیچر ہیں۔ پٹنہ یونیورسٹی میں ماضی میں بھی طلباء کے درمیان لڑائی، بم دھماکے اور فائرنگ کے واقعات ہو چکے ہیں۔ لیکن قتل کے اس معاملے نے لوگوں کو چونکا دیا ہے۔ حیران کن بات یہ ہے کہ کالج کیمپس میں طلبہ کے درمیان تقریباً 20 منٹ تک لڑائی جاری رہی۔ اس دوران 8-10 نقاب پوش لوگ ہرش راج کو مارتے رہے لیکن کوئی بھی اسے بچانے نہیں آیا۔ کالج کیمپس میں تقریباً ہمیشہ 10-20 طلباء موجود ہوتے ہیں۔ بتایا جا رہا ہے کہ حملہ آور جب کالج کے احاطے سے باہر نکلے تب اساتذہ اور دیگر ملازمین اپنے کمرہ  سے باہر آئے۔

ہرش راج پر لاٹھیوں، اینٹوں اور پتھروں سے حملہ کیا گیا۔ جسم کے تقریباً ہر حصے پر حملہ ہوا۔ ہرش راج کو خون بہہ جانے کی حالت میں اسپتال لے جایا گیا۔ جہاں علاج کے دوران اس کی موت ہو گئی۔ پولس معاملے کی تحقیقات کر رہی ہے۔ پولیس کا کہنا ہے کہ چندن یادو بھی اسی لاء کالج کا طالب علم ہے جس میں ہرش راج پڑھتا تھا۔ چندن یادو کو ہرش راج کے قتل کی سازش کا ماسٹر مائنڈ سمجھا جاتا ہے۔ پولیس اب چندن یادو سے پوچھ گچھ اور دیگر ملزمان کو گرفتار کرنے میں مصروف ہے۔ اس کے ساتھ ساتھ پولیس کالج کیمپس اور اس کے اطراف کی سی سی ٹی وی فوٹیج کی بھی جانچ کر رہی ہے، تاکہ ملزم کے خلاف ٹھوس شواہد اکٹھے کیے جا سکیں۔

بھارت ایکسپریس۔