TVK writes to Election Commission: ٹی وی کے نے الیکشن کمیشن کو لکھا خط، مشاورتی میٹنگ میں شامل کرنے کا کیا مطالبہ

چنئی: تملگا ویٹری کڑگم (TVK) نے ہفتے کے روز بھارت کے چیف الیکشن کمشنر (CEC) کو ایک باضابطہ خط لکھا ہے۔ خط میں 2026 کے مجوزہ تمل ناڈو اسمبلی انتخابات کی تیاریوں میں فعال کردار ادا کرنے کی خواہش ظاہر کی گئی ہے۔

میٹنگ میں TVK کو شامل نہ کرنے پر اعتراض

ٹی وی کے کے صدر وجے نے چیف الیکشن کمشنر کو خط لکھ کر ریاستی الیکشن کمیشن کی جانب سے سیاسی جماعتوں کی مشاورتی میٹنگز میں ان کی پارٹی کو شامل نہ کرنے پر سخت اعتراض ظاہر کیا ہے۔ انہوں نے اسے جمہوری عمل میں شمولیت کی کمی قرار دیتے ہوئے فوری مداخلت کی اپیل کی ہے۔

سبھی کو مساوی مواقع ملنا آئین کا بنیادی اصول

وجے نے خط میں واضح کیا ہے کہ ٹی وی کے نے پورے تمل ناڈو میں مضبوط عوامی بنیاد قائم کر لی ہے اور ریاست بھر میں انتخابات لڑنے کا اعلان کر چکی ہے۔ پارٹی کے پاس لاکھوں حامی ہیں جو زیادہ تر وجے کے فین کلبز پر مشتمل ہیں۔ خط میں لکھا گیا، ’’ہم جمہوری عمل کو اس طرح مضبوط بنانا چاہتے ہیں کہ ہر شہری کی آواز سنی جائے۔ تمام سیاسی جماعتوں کو مساوی مواقع دینا آئین کا بنیادی اصول ہے۔‘‘

یہ بھی پڑھیں: ریلیز سے پہلے ہی دیکھ سکیں گے فرحان اختر کی فلم ’120 بہادر‘، اداکار نے کیا اسپیشل اعلان

وجے نے کہا کہ ٹی وی کے کو ان میٹنگز سے باہر رکھنا ایک بڑے ووٹر طبقے کو شفاف نگرانی کے حق سے محروم کر رہا ہے، جس سے انتخابی غیرجانبداری پر عوام کا اعتماد کمزور ہوتا ہے۔ خط چیف الیکشن کمشنر، الیکشن کمشنرز، تمل ناڈو اسٹیٹ الیکشن کمشنر اور چیف الیکٹورل آفیسر کو بھی بھیجا گیا ہے۔

آئندہ تمام مشاورتی اجلاسوں میں بلانے کی اپیل

وجے نے درخواست کی کہ ٹی وی کے کو آئندہ تمام مشاورتی اجلاسوں، میٹنگز اور کوآرڈی نیشن پروگراموں میں مناسب اطلاع دے کر شامل کیا جائے۔ انہوں نے بھارتی آئین کے آرٹیکل 324 کے تحت الیکشن کمیشن کے اختیارات کا حوالہ دیتے ہوئے ریاستی الیکشن کمیشن کو ضروری ہدایات جاری کرنے کی اپیل کی۔ خط میں کہا گیا ہے، ’’یہ قدم شفافیت اور شمولیت کے اعلیٰ معیار کو برقرار رکھے گا اور انتخابی عمل کو مزید مضبوط بنائے گا۔ اس سے کسی کو کوئی نقصان نہیں ہوگا۔‘‘

بھارت ایکسپریس۔