قومی

Azam Khan ED Custody Remand: ایس پی لیڈر اعظم خان کی مشکلات میں اضافہ، ای ڈی کو 4 دن کی ریمانڈ، 16 نومبر تک ہوگی پوچھ گچھ

سماج وادی پارٹی کے سینئر لیڈر اور سابق وزیر محمد اعظم خان کی مشکلات میں اضافہ ہو گیا ہے۔ غازی آباد کی خصوصی پی ایم ایل اے عدالت نے انفورسمنٹ ڈائریکٹوریٹ (ای ڈی) کو ان کی چار دن کی کسٹڈی ریمانڈ دے دی ہے۔ اعظم خان کو کل لکھنؤ لایا جائے گا۔ ای ڈی 16 نومبر کی شام تک ان سے پوچھ گچھ کرے گی۔ تحقیقاتی ایجنسی 426.46 کروڑ روپے کے مبینہ مالی گھوٹالے، سرکاری رقم اور املاک کے مبینہ غلط استعمال سے متعلق معاملات کی جانچ کر رہی ہے۔ عدالت نے منی ٹریل اور متعلقہ کمپنیوں کے کردار کی تحقیقات کے لیے ریمانڈ کو ضروری قرار دیا ہے۔ تاہم عدالت نے پوچھ گچھ کے دوران طبی معائنہ کرانے اور کسی بھی طرح کی اذیت نہ دینے کی ہدایت بھی دی ہے۔ ہائی کورٹ سے ضمانت ملنے کے بعد 31 اکتوبر کو رام پور جیل سے رہا ہونے والے اعظم خان کو انفورسمنٹ ڈائریکٹوریٹ نے جوہر یونیورسٹی سے متعلق منی لانڈرنگ کے معاملے میں فوراً گرفتار کر لیا تھا۔ اس کے بعد یکم نومبر کو انہیں خصوصی پی ایم ایل اے عدالت میں پیش کیا گیا، جہاں سے انہیں عدالتی حراست میں بھیج دیا گیا۔ تب سے اعظم خان غازی آباد کی ڈاسنا جیل میں بند ہیں۔

شیوپال یادو نے اعظم خان سے ملاقات کی تھی

سماج وادی پارٹی کے قومی جنرل سکریٹری شیوپال یادو نے جمعرات کو غازی آباد ضلع جیل پہنچ کر پارٹی کے سینئر لیڈر اعظم خان سے ملاقات کی تھی۔ ملاقات کے بعد شیوپال یادو نے یوگی حکومت کو نشانہ بنایا تھا اور اعظم خان کو ہراساں کرنے کا الزام لگایا تھا۔ انہوں نے یہ دعویٰ بھی کیا تھا کہ اعظم خان سماج وادی پارٹی میں تھے اور آئندہ بھی پارٹی میں رہیں گے۔ ای ڈی کا منی لانڈرنگ کا معاملہ جوہر ٹرسٹ اور رام پور میں واقع جوہر یونیورسٹی سے منسلک مبینہ مالی بے ضابطگیوں اور زمین کے لین دین پر مرکوز ہے۔ تحقیقاتی ایجنسی نے اس معاملے میں کئی سنگین الزامات عائد کیے ہیں۔ ای ڈی کا دعویٰ ہے کہ نجی یونیورسٹی کا بنیادی ڈھانچہ تیار کرنے کے لیے سرکاری رقم استعمال کی گئی۔ ایجنسی کے مطابق، مبینہ طور پر سرکاری فنڈ کو دوسرے مدوں میں منتقل کرکے اس کا غلط استعمال کیا گیا۔

ای ڈی نے عائد کیے کئی الزامات

تحقیقاتی ایجنسی کے مطابق، ٹھیکے حاصل کرنے والی کمپنیوں کے منیجنگ ڈائریکٹروں نے اعتراف کیا ہے کہ سرکاری ٹھیکوں کی تقریباً 30 فیصد رقم اعظم خان کے نجی بینک کھاتوں اور دیگر مستفیدین تک پہنچائی گئی تھی۔ ای ڈی کا الزام ہے کہ سیاسی دباؤ ڈال کر لوگوں سے چندہ وصول کیا گیا۔ اس کے علاوہ سرکاری رقم سے تیار کی گئی املاک، جن میں او بی سی ہاسٹل بھی شامل ہے، مبینہ طور پر غیر قانونی طریقے سے جوہر یونیورسٹی ٹرسٹ کے نام منتقل کی گئیں۔ اعظم خان کی گرفتاری کے ساتھ ہی ای ڈی نے ان سے وابستہ کئی مقامات پر تلاشی مہم بھی چلائی۔ تحقیقات کے دوران ایجنسی نے جوہر یونیورسٹی سے متعلق کچھ املاک کو بھی ضبط کیا ہے۔

بھارت ایکسپریس اردو۔

Abdul Awwal