Himachal Pradesh Fire: ہماچل پردیش کے بازار میں خوفناک آتش زدگی، متعدد سلنڈر دھماکے،8 سالہ بچی زندہ جل کر جاں بحق، 8 افراد لاپتہ

ہماچل پردیش کے ضلع سولن میں واقع آرکی بازار میں اتوار اور پیر کی درمیانی شب تقریباً ڈھائی بجے اچانک بھیانک آگ بھڑک اٹھی۔ اس دردناک حادثے میں 8 سالہ ایک بچی زندہ جل کر جاں بحق ہو گئی، جب کہ 7 سے 8 افراد کے اب بھی لاپتہ ہونے کی اطلاع ہے۔ لاپتہ افراد میں دو خواتین، دو مرد اور چار بچے شامل بتائے جا رہے ہیں، جس سے علاقے میں شدید خوف و ہراس پھیل گیا ہے۔ابتدائی اطلاعات کے مطابق آگ سب سے پہلے ایک رہائشی مکان میں لگی، جو چند ہی لمحوں میں آس پاس کی دکانوں اور مکانات تک پھیل گئی۔ دیکھتے ہی دیکھتے پورا بازار دھویں اور شعلوں کی لپیٹ میں آ گیا۔ آگ کی شدت کا اندازہ اس بات سے لگایا جا سکتا ہے کہ کم از کم چھ مکانات مکمل طور پر جل کر راکھ ہو گئے، جب کہ متعدد دکانیں بھی تباہ ہو گئیں۔ متاثرہ خاندانوں کا سارا سامان اور جمع پونجی آگ کی نذر ہو گئی۔

حادثے کے دوران کئی ایل پی جی سلنڈروں کے پھٹنے سے صورتحال مزید سنگین ہو گئی۔ سلنڈروں کے زور دار دھماکوں کے باعث آگ تیزی سے پھیلتی چلی گئی، جس سے فائر بریگیڈ کے عملے کو آگ پر قابو پانے میں شدید مشکلات کا سامنا کرنا پڑا۔ دھماکوں کی آوازوں سے آس پاس کے لوگ خوفزدہ ہو کر اپنے گھروں سے باہر نکل آئے اور پورے علاقے میں افراتفری کا منظر دیکھنے میں آیا۔اطلاع ملتے ہی فائر بریگیڈ، پولیس اور انتظامیہ کی ٹیمیں موقع پر پہنچ گئیں۔ مقامی لوگوں نے بھی امدادی کاموں میں تعاون کیا۔ کئی گھنٹوں کی مسلسل جدوجہد کے بعد بالآخر آگ پر قابو پا لیا گیا، تاہم تب تک بازار کا بڑا حصہ جل کر خاکستر ہو چکا تھا۔ آگ بجھانے کے بعد ملبے میں لاپتہ افراد کی تلاش کا عمل شروع کیا گیا، جو تاحال جاری ہے۔

واقعے کی اطلاع ملنے پر مقامی رکن اسمبلی سنجے اوستھی بھی موقع پر پہنچے اور حالات کا جائزہ لیا۔ انہوں نے بتایا کہ آگ لگنے کی اصل وجہ کا ابھی تک پتہ نہیں چل سکا ہے۔ ان کے مطابق لاپتہ افراد کی تلاش کے لیے سرچ آپریشن تیز کر دیا گیا ہے اور انتظامیہ ہر ممکن کوشش کر رہی ہے کہ متاثرین کو جلد از جلد مدد فراہم کی جا سکے۔اس المناک حادثے کے بعد پورے علاقے میں غم اور سوگ کی فضا ہے۔ متاثرہ خاندان شدید صدمے میں ہیں، جن کے لیے زندگی ایک لمحے میں بدل گئی۔ انتظامیہ کی جانب سے راحت اور بچاؤ کے کام مسلسل جاری ہیں، جبکہ آگ لگنے کی وجوہات جاننے کے لیے باضابطہ تفتیش بھی شروع کر دی گئی ہے۔

بھارت ایکسپریس اردو