Kashi Tamil Sangamam 4.0 : ثقافتی ہم آہنگی کے فروغ کیلئے 7 اسپیشل ٹرینیں چلانے کا اعلان، بنارس کے اسکولوں میں تمل تعلیم کا آغاز ، ’کاشی تمل سنگم‘ 4.0 کا شاندار افتتاح

بھارت کی ثقافتی یکجہتی اور قومی اتحاد کو مضبوط بنانے کے مقصد سے بھارتی ریلوے نے تمل ناڈو اور کاشی (وارانسی) کے درمیان خصوصی طور پر 7 اسپیشل ٹرینیں چلانے کا اعلان کیا ہے۔ یہ اقدام ’کاشی تمل سنگم‘ کے چوتھے ایڈیشن کے تحت کیا گیا ہے، جس کا مقصد تمل زبان و ثقافت اور کاشی کی قدیم روحانی وراثت کے درمیان صدیوں پرانے رشتے کو ازسرِنو مستحکم کرنا ہے۔ بھارتی ریلوے کے مطابق یہ اسپیشل ٹرینیں کنیاکُماری، چنئی، کوئمبٹور اور بنارس کے درمیان مرحلہ وار چلائی جا رہی ہیں تاکہ ملک بھر سے خصوصاً تمل بولنے والے علاقوں کے طلبہ، اساتذہ، فنکاروں، اسکالروں، روحانی لیڈروں اور ثقافتی کارکنوں کی بڑے پیمانے پر شرکت ممکن ہو سکے۔ ان ٹرینوں کو ایک منظم شیڈول کے مطابق اس طرح تیار کیا گیا ہے کہ شرکاء کو آرام دہ طویل سفر، محفوظ کنیکٹیویٹی اور وقت پر پہنچنے کی سہولت میسر ہو۔

اس سلسلے کی پہلی خصوصی ٹرین 29 نومبر 2025 کو کنیاکُماری سے روانہ ہوئی، جس کے بعد آج چنئی سے دوسری خصوصی ٹرین بنارس کے لیے روانہ کی گئی۔ آئندہ روانگیاں 3 دسمبر کو کوئمبٹور سے، 6 دسمبر کو چنئی سے، 7 دسمبر کو کنیاکُماری سے، 9 دسمبر کو کوئمبٹور سے اور 12 دسمبر 2025 کو چنئی سے طے کی گئی ہیں۔ یوں مختلف شہروں سے بنارس کیلئے مجموعی طور پر سات اسپیشل ٹرینیں متعین شیڈول کے مطابق سفر کریں گی۔ اسی طرح واپسی کے سفر کے لیے بھارتی ریلوے نے بنارس سے 5 دسمبر کو کنیاکُماری کیلئے، 7 دسمبر کو چنئی کیلئے اور 9 دسمبر کو کوئمبٹور کیلئے خصوصی خدمات فراہم کی ہیں، جبکہ 11، 13، 15 اور 17 دسمبر کو مزید اسپیشل ٹرینیں بھی روانہ ہوں گی تاکہ شرکاء کو وقت پر اور سہولت کے ساتھ اپنے شہروں تک پہنچایا جا سکے۔

تمل تعلیم کا آغاز—اہم سنگِ میل
’کاشی تمل سنگم‘ 4.0 کا مرکزی موضوع “آئیے تمل سیکھیں — تمل کَرکلَم” ہے۔ اس کے تحت آج سے وارانسی کے معروف اسکولوں میں تمل زبان کی تعلیم رسمی طور پر شروع کر دی گئی ہے۔ اس اقدام کا مقصد دونوں خطوں کے درمیان لسانی و ثقافتی تبادلے کو فروغ دینا اور نوجوان نسل کو ایک دوسرے کی تہذیب سے قریب لانا ہے۔ تمل ناڈو کے طلبہ کے لیے کاشی کے تعلیمی و ثقافتی دورے بھی طے کیے گئے ہیں، جبکہ تینکاسی سے کاشی تک علامتی ’رِشی اگستیا یاترا‘ کا آغاز بھی ثقافتی اتحاد کی علامت کے طور پر کیا گیا ہے۔

’ایک بھارت شریشٹھ بھارت‘ کا عملی مظاہرہ
یہ پروگرام تعلیم کی مرکزی وزارت کی نگرانی میں منعقد کیا جا رہا ہے، جس میں آئی آئی ٹی مدراس اور بنارس ہندو یونیورسٹی علم کے مرکزی شراکت دار ہیں، جبکہ ریلوے سمیت کم از کم دس مرکزی وزارتیں تعاون کر رہی ہیں۔ اس پروگرام کے ذریعے دونوں خطّوں کے فنکاروں، کاریگروں، دانشوروں، اساتذہ اور ثقافتی نمائندوں کو باہمی تبادلۂ خیال، روایتی علم اور تہذیبی تجربات بانٹنے کا موقع ملے گا۔

بھارتی ریلوے نے منظم شیڈول کے مطابق خصوصی ٹرینیں چلا کر اور ثقافتی طور پر بھرپور سفر کے انتظامات کر کے پورے ملک کے متنوع علاقوں کو جوڑنے اور تمل ناڈو اور کاشی کے درمیان مشترکہ وراثت کو زندہ رکھنے میں مرکزی کردار ادا کیا ہے۔ یہ قدم ’ایک بھارت شریشٹھ بھارت‘ کے تصور کو حقیقت کا روپ دیتا ہے اور ملک کی ثقافتی وحدت و بھائی چارے کی مضبوط مثال پیش کرتا ہے۔

بھارت ایکسپریس اردو