PM Modi in Rajya Sabha: اکیسویں صدی کی دوسری سہ ماہی ’وکست بھارت‘ کی تعمیر میں فیصلہ کن ثابت ہوگی: وزیراعظم

نئی دہلی: وزیراعظم نریندر مودی نے کہا ہے کہ اکیسویں صدی کی پہلی سہ ماہی مکمل ہو چکی ہے اور دوسری سہ ماہی اتنی ہی فیصلہ کن ثابت ہوگی جتنی گزشتہ صدی میں آزادی کی جدوجہد کی دوسری سہ ماہی تھی۔ انہوں نے کہا کہ بھارت تیزی کے ساتھ ’وکست بھارت‘ کی سمت بڑھ رہا ہے۔ راجیہ سبھا میں صدر جمہوریہ کے خطبے پر شکریے کی تحریک کے جواب میں خطاب کرتے ہوئے وزیراعظم نے کہا کہ دنیا تیزی سے ایک نئے عالمی نظام کی طرف بڑھ رہی ہے اور ایسے وقت میں بھارت ایک قابل اعتماد عالمی شراکت دار کے طور پر ابھر کر سامنے آیا ہے۔

عالمی سطح پر بھارت کی بڑھتی اہمیت

وزیر اعظم مودی نے کہا: ’’اگر ہم موجودہ عالمی حالات اور حالات حاضرہ کا غیر جانبداری سے جائزہ لیں تو یہ بات واضح ہو جاتی ہے کہ دنیا بھر میں بھارت کی طرف رجحان بڑھ رہا ہے۔ آج بھارت ایک ’وشوامتر‘ اور ’وشوابندھو‘ کے طور پر کئی ممالک کا قابل اعتماد شراکت دار بن چکا ہے۔‘‘ انہوں نے مزید کہا کہ دنیا ایک نئے عالمی نظام کی تشکیل کی جانب بڑھ رہی ہے اور بھارت اس میں اہم کردار ادا کر رہا ہے۔

دوسری سہ ماہی: ترقی کی نئی بنیاد

وزیر اعظم نے کہا: ’’اکیسویں صدی کی پہلی سہ ماہی مکمل ہو چکی ہے، لیکن یہ دوسری سہ ماہی اتنی ہی فیصلہ کن ہے جتنی پچھلی صدی میں آزادی کی تحریک کی دوسری سہ ماہی تھی۔ مجھے پورا یقین ہے کہ وکست بھارت کی تعمیر کے لیے یہ دور نہایت اہم ثابت ہوگا۔‘‘ انہوں نے کہا کہ بھارت درست سمت میں تیز رفتاری سے آگے بڑھ رہا ہے اور ترقی کے نئے سنگ میل طے کر رہا ہے۔ وزیراعظم نے کہا کہ بھارت دنیا کے کئی ممالک کے ساتھ مستقبل پر مبنی تجارتی معاہدے کر رہا ہے۔ ’’حال ہی میں ہم نے ایسے نو اہم تجارتی معاہدے مکمل کیے ہیں، جن میں سب سے نمایاں اور اہم معاہدہ یورپی یونین کے 27 رکن ممالک کے ساتھ طے پایا ہے، جسے اکثر ’تمام معاہدوں کی ماں‘ کہا جا رہا ہے۔‘‘

اپوزیشن پر طنزیہ تبصرہ

خطاب کے دوران جب اپوزیشن اراکین نے نعرے بازی شروع کی تو وزیراعظم نے بالواسطہ طنز کرتے ہوئے کہا: ’’کھڑگے جی کی عمر کو دیکھتے ہوئے میں چیئرمین سے درخواست کرتا ہوں کہ انہیں بیٹھ کر نعرے لگانے کی اجازت دی جائے تاکہ انہیں کسی قسم کی تکلیف نہ ہو۔ پیچھے نوجوان اراکین بھی ہیں، اس لیے براہ کرم کھڑگے جی کو بیٹھ کر نعرے بازی کی اجازت دیں۔‘‘ واضح رہے کہ اسی روز لوک سبھا میں صدر کے خطبے پر شکریے کی تحریک کو صوتی ووٹ کے ذریعے منظور کر لیا گیا، تاہم اس دوران بھی اپوزیشن کی جانب سے شدید نعرے بازی کی گئی۔

بھارت ایکسپریس اردو۔