سنبھل کے افسران نہیں کریں گے پریس کانفرنس، ڈی ایم نے لگائی پابندی، ہولی اور جمعہ سے متعلق سی او انوج چودھری کے بیان کے بعد ہوا تھا ہنگامہ

اترپردیش کے سنبھل میں گزشتہ دنوں ہولی اورجمعہ سے متعلق سی اوانوج چودھری کا بیان نہ صرف سرخیاں بنا بلکہ اس کی بڑے پیمانے پر مخالفت بھی ہوئی۔ بیان سوشل میڈیا پرتیزی سے وائرل ہوا تھا۔ سی اوانوج چودھری کے بیان کے بعد اب انتظامیہ حرکت میں آگئی ہے۔ سنبھل کے ڈی ایم راجیندرپسیا نے سبھی افسران کی میڈیا بریفنگ پر روک لگا دی ہے۔

سنبھل کے ڈی ایم راجیندر پسیا نے حکم دیا ہے کہ اب کوئی بھی افسربغیراجازت کے میڈیا میں کسی بھی طرح کا بیان نہیں دے گا۔ ضلع میں ڈی ایم اورایس پی کی اجازت کے بعد ہی افسران کوئی بیان میڈیا کودے سکتے ہیں۔ کلکٹرکے اس حکم کے بعد اب سنبھل میں کوئی بھی افسر میڈیا سے بات نہیں کرپائے گا۔

سی او انوج چودھری کے بیان پر ہوا ہنگامہ

ہولی اور جمعہ ایک ہی دن پڑنے سے متعلق سنبھل کے سی اوانوج چودھری کا ایک بیان سامنے آیا ہے، جس میں انہوں نے کہا کہ جمعہ سال میں 52 بارآتا ہے، ہولی سال میں ایک بارآتی ہے۔ مسلم طبقے کے لوگوں کو اگریہ لگتا ہے کہ ہولی کے رنگ سے آپ کا مذہب برباد ہوجائے گا تواس دن گھرسے نہ نکلیں۔ اگرہولی پر کوئی شرپسند غلط کام کرتا ہوا پایا گیا تواسے بخشا نہیں جائے گا۔ سنبھل میں ہم لاء ایند آرڈر خراب نہیں ہونے دیں گے۔

سماجوادی پارٹی نے سی اوکوآڑے ہاتھوں لیا

سنبھل سی اوکے بیان کے بعد اپوزیشن حکومت پرحملہ آورہوگیا تھا۔ اکھلیش یادو سمیت کئی لیڈران نے سی او کے اس بیان پر ناراضگی ظاہر کی تھی۔ انوج چودھری پرتنقید کرتے ہوئے کہا کہ اگرافسرہی منفی بات کریں گے تو فرقہ وارانہ ماحول کا تحفظ کیسے ہوگا؟ سماجوادی پارٹی کے صدرنے اپنے سوشل میڈیا اکاؤنٹ ایکس پر پوسٹ لکھ کربی جے پی اور سنبھل سی اوانوج چودھری کوآڑے ہاتھوں لیا۔