Harsh Vardhan Shringla thanks PM Modi: راجیہ سبھا کے لیے نامزد ہرش وردھن شرنگلا نے وزیر اعظم مودی کا ادا کیا شکریہ

ہندوستان کے سابق سکریٹری خارجہ اور سینئر سفارت کار ہرش وردھن شرنگلا کو صدر نے راجیہ سبھا کے لیے نامزد کیا ہے۔ اس موقع پر وزیر اعظم نریندر مودی اور بی جے پی کے قومی صدر جے پی نڈا نے انھیں مبارکباد دی۔ جس کے بعد ہرش وردھن نے پی ایم مودی اور جے پی نڈا کا شکریہ ادا کیا۔

ہرش وردھن شرنگلا نے سوشل میڈیا پر پی ایم مودی اور جے پی نڈا کا شکریہ ادا کرتے ہوئے کہا کہ وہ ملک کی خدمت کے لیے ہمہ وقت تیار ہیں اور اس موقع کے لیے شکر گزار ہیں۔ ہرش وردھن شرنگلا نے لکھا کہ ’’میں اس ذمہ داری کے لیے وزیر اعظم نریندر مودی اور صدر جمہوریہ کا شکریہ ادا کرتا ہوں۔ میں ہمیشہ ملک کی خدمت کرنا چاہتا تھا اور ریٹائرمنٹ کے بعد بھی میں نے اس میں کوئی کمی نہیں آنے دی۔ میں اس موقع کے لیے شکر گزار ہوں اور وعدہ کرتا ہوں کہ میں عوام کے لیے کام کروں گا، ان کے ساتھ کھڑا ہوں گا اور ان کی آواز بنوں گا۔‘‘

انھوں نے مزید کہا کہ ’’میں بین الاقوامی سطح پر اپنے ملک کو مزید مضبوط بنانے کی کوشش کرتا رہوں گا۔‘‘ واضح رہے کہ وزیر اعظم نریندر مودی نے ہرش وردھن شرنگلا کی تعریف کرتے ہوئے کہا ہے کہ وہ ایک بہترین سفارت کار، دانشور اور اسٹریٹجک مفکر ہیں۔ جے پی نڈا نے بھی شرنگلا کو مبارکباد دی اور کہا کہ ان کا عالمی تجربہ ایوان بالا کو قیمتی تناظر فراہم کرے گا۔

ہرش وردھن شرنگلا کا سفارتی اور سیاسی سفر

ہرش وردھن 1 مئی 1962 کو پیدا ہوئے۔ میو کالج، اجمیر، راجستھان سے انٹرمیڈیٹ کی تعلیم مکمل کرنے کے بعد وہ دہلی چلے گئے، جہاں انھوں نے سینٹ اسٹیفن کالج سے بیچلر کی ڈگری حاصل کی۔ وہ 1984 میں IFS بنے اور 38 سال تک مختلف ممالک میں ہندوستان کی نمائندگی کی۔ وزارت خارجہ میں خدمات کے دوران انھوں نے مختلف ممالک میں بطور سفارت کار کام کیا۔ 2014 سے 2016 تک وہ تھائی لینڈ میں ہندوستان کے سفارت کار تھے۔ اسی طرح سال 2023 میں ہرش وردھن کو ہندوستان کی G-20 صدارت کے لیے چیف کوآرڈینیٹر مقرر کیا گیا تھا۔ ان کی نگرانی میں ملک کی مختلف ریاستوں میں G-20 کا کامیابی سے انعقاد کیا گیا۔

بھارت ایکسپریس اردو