Project Veer Gatha: مودی حکومت کے ’’پروجیکٹ ویر گاتھا‘‘ میں ریکارڈ شرکت، 1.92 کروڑ طلبہ نے لیا حصہ، جانئے دو وزارتوں نے کیوں شروع کیا یہ پروگرام؟

نئی دہلی: مودی حکومت کی جانب سے شروع کیے گئے قومی سطح کے تعلیمی و ثقافتی پروگرام ’’پروجیکٹ ویر گاتھا‘‘ نے ایک بار پھر تاریخ رقم کر دی ہے۔ سال 2025-26 میں منعقد ہونے والے ’’ویر گاتھا 5.0‘‘ میں ملک اور بیرونِ ملک کے تقریباً 1.90 لاکھ اسکولوں سے وابستہ ریکارڈ 1.92 کروڑ طلبہ نے شرکت کی۔ دفاعی وزارت کے مطابق یہ اب تک کا سب سے زیادہ شرکت والا ایڈیشن ہے، جس نے طلبہ میں حب الوطنی، قومی شعور اور ہندوستانی فوجی روایات سے وابستگی کو مضبوط کیا ہے۔ پروجیکٹ ویر گاتھا، وزارتِ دفاع اور وزارتِ تعلیم کی مشترکہ پہل ہے، جسے یومِ جمہوریہ کی تقریبات کے تحت منعقد کیا جاتا ہے۔ اس پروگرام کا مقصد طلبہ کو ہندوستان کے بہادر سپاہیوں، جنگجوؤں اور آزادی کے متوالوں کی قربانیوں سے روشناس کرانا اور ان کے اندر تخلیقی صلاحیتوں کے ذریعے قومی فخر کا جذبہ بیدار کرنا ہے۔ دفاعی وزارت کے مطابق اس منصوبے کا آغاز سال 2021 میں ’’آزادی کا امرت مہوتسو‘‘ کے تحت ہوا تھا، جب بھارت نے آزادی کے 75 سال مکمل کیے تھے۔

ویر گاتھا 5.0 کا باضابطہ آغاز 8 ستمبر 2025 کو کیا گیا تھا۔ اس سال طلبہ کی تخلیقی شرکت کو مزید وسعت دینے کے لیے کئی نئی خصوصیات شامل کی گئیں۔ پہلی بار شارٹ ویڈیو فارمیٹس جیسے ویڈیوگرافی، اینکرنگ، رپورٹنگ اور اسٹوری ٹیلنگ کو مقابلے کا حصہ بنایا گیا۔ طلبہ کو ہندوستان کی عسکری روایات، فوجی حکمتِ عملی، تاریخی جنگی مہمات اور عظیم ویر گاتھاؤں پر مبنی مواد تیار کرنے کی ترغیب دی گئی۔ اس منصوبے کے تحت طلبہ نے کلنگ کے راجہ کھارویل، پرتھوی راج چوہان، چھترپتی شیواجی مہاراج، 1857 کی جنگِ آزادی کے مجاہدین، قبائلی تحریکوں کے قائدین اور دیگر عظیم ہندوستانی جنگجوؤں کی بے مثال بہادری اور جنگی حکمتِ عملی کا مطالعہ کیا۔ دفاعی وزارت کا کہنا ہے کہ موضوعات کی اس وسعت نے نہ صرف طلبہ کی تخلیقات کے معیار کو بہتر بنایا بلکہ ان کی تاریخی اور ثقافتی سمجھ کو بھی گہرا کیا۔

ویر گاتھا 5.0 کے تحت قومی سطح پر 100 ’’سپر ونرز‘‘ کا انتخاب کیا گیا ہے۔ ان میں پرائمری سطح پر جماعت 3 سے 5 تک کے 25 طلبہ، مڈل سطح پر جماعت 6 سے 8 تک کے 25 طلبہ اور سیکنڈری سطح پر جماعت 9 سے 12 تک کے 50 طلبہ شامل ہیں۔ جماعت 9-10 اور 11-12 کے طلبہ کی مساوی نمائندگی کو بھی یقینی بنایا گیا ہے۔ یہ تمام 100 سپر ونرز یومِ جمہوریہ 2026 کے موقع پر کرتویہ پتھ پر ہونے والی پریڈ کو بطور خصوصی مہمان دیکھنے کا اعزاز حاصل کریں گے۔ ہر منتخب طالب علم کو 10 ہزار روپے کی نقد انعامی رقم دی جائے گی اور نئی دہلی میں وزارتِ دفاع اور وزارتِ تعلیم کی جانب سے مشترکہ طور پر اعزاز سے نوازا جائے گا۔ اس سال ایک اہم توسیع کے طور پر بیرونِ ملک قائم سی بی ایس ای سے منسلک اسکولوں نے بھی پہلی بار اس پروگرام میں حصہ لیا۔

دفاعی وزارت کے مطابق 18 ممالک کے 91 اسکولوں سے 28,005 طلبہ نے اپنی تخلیقات ارسال کیں، جس سے ہندوستان کی بہادری اور قومی وقار کی کہانیاں عالمی سطح تک پہنچیں۔ اسکولوں میں مقامی سطح پر سرگرمیاں منعقد کی گئیں، بہادری اعزاز یافتگان کے ساتھ مکالمے ہوئے اور بہترین تخلیقات مائی گوو پورٹل کے ذریعے جمع کرائی گئیں۔ وزارت کا کہنا ہے کہ قومی فاتحین کے علاوہ ریاستی اور مرکز کے زیرِ انتظام علاقوں کی سطح پر 8 اور ضلع سطح پر 4 فاتحین بھی منتخب کیے جائیں گے، جنہیں مقامی انتظامیہ اعزاز دے گی۔ حکومت کے مطابق ’’پروجیکٹ ویر گاتھا‘‘ کا بنیادی مقصد نئی نسل میں حب الوطنی، شہری ذمہ داری اور قومی یکجہتی کے جذبے کو مضبوط کرنا ہے، اور ریکارڈ شرکت اس بات کا ثبوت ہے کہ یہ پہل اپنے مقصد میں کامیاب ہو رہی ہے۔

بھارت ایکسپریس اردو