PM Modi: وزیر اعظم نریندر مودی نے این ٹی آر کو پیش کیا خراج عقیدت، کہا-این ڈی اے حکومت تلنگانہ میں پورا کر رہی ہے ان کا کام

وزیر اعظم نریندر مودی نے بدھ کے روز مشہور اداکار اور آندھرا پردیش کے سابق وزیر اعلیٰ ننداموری تارکا راما راؤ (این ٹی آر) کو ان کی 102 ویں یوم پیدائش پر خراج عقیدت پیش کرتے ہوئے سنیما اور عوامی خدمات میں ان کے نمایاں کارناموں اور وسیع اثرات کا اعتراف کیا۔ سوشل میڈیا پر ایک پوسٹ کے ذریعے وزیر اعظم مودی نے پس ماندہ لوگوں کی فلاح و بہبود کے لیے این ٹی آر کی لگن اور اس سے ان کی عمر بھر کی وابستگی کی تعریف کی۔

وزیر اعظم مودی نے لکھا کہ ’’میں این ٹی آر گارو کو ان کی یوم پیدائش پر خراج عقیدت پیش کرتا ہوں۔ معاشرے کی خدمت کرنے اور غریبوں اور پسماندہ لوگوں کو بااختیار بنانے کی ان کی کوششوں کے لیے ان کی بڑے پیمانے پر تعریف کی جاتی ہے۔ آندھرا پردیش میں این ڈی اے حکومت، جس کی قیادت میرے دوست چندرابابو نائیڈو گارو کر رہی ہے، این ٹی آر کے وژن کو پورا کرنے کے لیے کام کر رہی ہے۔‘‘

چندرا بابو نائیڈو نے بھی این ٹی آر کو کیا یاد

دریں اثنا آندھرا پردیش کے وزیر اعلیٰ این چندرابابو نائیڈو نے بھی اس موقع پر این ٹی آر کو خراج عقیدت پیش کرتے ہوئے انھیں تیلگو عوام کے لیے باعث فخر اور تیلگوں کی ایک ناقابل فراموش نشانی قرار دیا۔ نائیڈو نے سماجی اصلاحات اور غریبوں اور پس ماندہ لوگوں کے لیے ان کی خدمات پر بھی روشنی ڈالی۔

انھوں نے لکھا ’’میں اس زمانے کے عظیم انسان، عالمی شہرت یافتہ اداکار، تیلگو لوگوں کے آئیڈیل، تیلگو لوگوں کی عزت نفس کو دنیا کے سامنے دکھانے والے عظیم انسان، فلاح و بہبود کے لیے ایک نیا راستہ دکھانے والے سماجی مصلح اور ’انّا‘ ننداموری تاراکا راما راؤ کو خراج تحسین پیش کرتا ہوں۔‘‘

واضح رہے کہ ننداموری تارکا راما راؤ، جنھیں این ٹی آر کے نام سے جانا جاتا ہے، ہندوستانی سنیما اور سیاست کی ایک بلند پایہ شخصیت تھے۔ انھوں نے سات سال تک آندھرا پردیش کے وزیر اعلیٰ کی حیثیت سے خدمات انجام دیں اور وہ ایک اداکار، پروڈیوسر، ہدایت کار، ایڈیٹر اور سیاست دان تھے۔ انھوں نے ’تھوڈو ڈونگالو‘ (1954)، ’سیتاراما کلیانم‘ (1960) اور ’وراکٹنم‘ (1970) کی ہدایت کاری کے لیے تین قومی فلم ایوارڈز جیتے۔ انھوں نے تقریباً 300 سے زیادہ فلموں میں کام کیا۔ این ٹی آر کا 18 جنوری 1996 کو حیدرآباد میں واقع اپنی رہائش گاہ پر 72 سال کی عمر میں دل کا دورہ پڑنے سے انتقال ہوا تھا۔

بھارت ایکسپریس اردو