PM Modi Thailand Visit: وزیر اعظم مودی نے کہا-ہندوستان کی ’’ایکٹ ایسٹ‘‘ پالیسی کے حوالے سے تھائی لینڈ کا ہے نہایت اہم کردار، متعد شعبوں میں باہمی تعاون پر کی گفتگو

وزیر اعظم نریندر مودی نے بنکاک کے اپنے دورے کے دوران ہندوستان کی ’’ایکٹ ایسٹ‘‘ پالیسی اور ہند-بحرالکاہل وژن میں تھائی لینڈ کے اہم کردار کا ذکر کیا۔ اپنی تھائی ہم منصب شیناواترا کے ساتھ پریس سے خطاب کرتے ہوئے وزیر اعظم مودی نے دونوں ممالک کے درمیان گہرے اقتصادی، ثقافتی اور اسٹریٹجک تعلقات کو فروغ دینے کی اہمیت پر زور دیا۔

پی ایم مودی نے ہند-بحرالکاہل خطے میں آزاد، کھلے اور حکمرانی پر مبنی نظم کو برقرار رکھنے کے لیے دونوں ممالک کے عزم پر زور دیا۔ انھوں نے ASEAN اتحاد کے لیے ہندوستان کی حمایت کا اعادہ کیا اور ہندوستان اور تھائی لینڈ کے درمیان مشترکہ اقدار کو اجاگر کیا، جس میں توسیع پسندی کے بجائے ترقی پسندی کو ترجیح دینے کی بات کہی۔ وزیر اعظم مودی نے کہا ’’ہندوستان ASEAN اتحاد اور اس کی مرکزیت کی مکمل حمایت کرتا ہے۔ ہند-بحرالکاہل میں ہم دونوں آزاد، کھلے، جامع اور اصول پر مبنی نظم کی حمایت کرتے ہیں۔ ہم ترقی پسندی کی پالیسی پر یقین رکھتے ہیں، توسیع پسندی کی پالیسی پر نہیں۔‘‘

دونوں ممالک اسٹریٹجک شراکت داری پر متفق

ایک اہم قدم میں دونوں رہنماؤں نے ہندوستان-تھائی لینڈ تعلقات کو اسٹریٹجک پارٹنرشپ تک بڑھانے پر اتفاق کیا۔ اس اقدام کے ایک حصے کے طور پر انھوں نے سیکیورٹی ایجنسیوں کے درمیان اسٹریٹجک ڈائیلاگ کے قیام پر تبادلۂ خیال کیا، جس کا مقصد دفاع، Maritime سیکیورٹی اور انسداد دہشت گردی کی کوششوں میں تعاون کو بڑھانا ہے۔ پی ایم مودی اور پی ایم شیناواترا نے دو طرفہ تجارت اور سرمایہ کاری کو مضبوط بنانے کے طریقوں پر بھی گفتگو کی، خاص طور پر سیاحت، ایم ایس ایم ای، زراعت اور فن ٹیک جیسے شعبے۔ اس دوران ہینڈ لومز، دستکاری اور چھوٹے کاروبار میں تعاون کو فروغ دینے کے لیے معاہدوں پر بھی دستخط کیے گئے۔

سیکیورٹی اور علاقائی تعاون

دونوں رہنماؤں نے خاص طور پر میری ٹائم سیکیورٹی اور سائبر کرائم سے نمٹنے میں سیکیورٹی تعلقات کو مضبوط بنانے کی اہمیت پر زور دیا۔ پی ایم مودی نے سائبر فراڈ کے شکار ہندوستانی متاثرین کو وطن واپس لانے کے لیے تھائی حکومت کی حمایت کے لیے شکریہ ادا کیا اور دہشت گردی اور منی لانڈرنگ کا مقابلہ کرنے کے لیے مشترکہ کوششوں پر زور دیا۔ پی ایم مودی کا تھائی لینڈ دورہ ہندوستان کے علاقائی اثر و رسوخ کو مضبوط کرنے اور دو طرفہ تعاون کو گہرا کرنے کی طرف ایک اہم قدم ہے۔ بات چیت اور معاہدوں نے دونوں ممالک کے درمیان مضبوط اقتصادی ترقی، بہتر سیکورٹی تعلقات اور مضبوط ثقافتی تبادلوں کی راہ ہموار کی ہے۔

بھارت ایکسپریس اردو