PM Modi in Bihar: وزیر اعظم مودی نے کرکٹ کے نئے ستارے ویبھو سوریا ونشی سے کی ملاقات، جانیے کیا کہا

وزیر اعظم نریندر مودی نے بہار کے اپنے دو روزہ دورے کے دوران جمعہ کو پٹنہ ہوائی اڈے پر چودہ سالہ کرکٹر ویبھو سوریاونشی اور ان کے والدین سے ملاقات کی۔ وزیر اعظم نے پنڈال سے روانگی سے قبل نوجوان اور اس کے اہل خانہ سے گرم جوشی سے بات چیت کی۔ سوشل میڈیا پلیٹ فارم ’ایکس‘ پر اس ملاقات کی جھلکیاں شیئر کرتے ہوئے وزیر اعظم مودی نے لکھا کہ ’’پٹنہ ہوائی اڈے پر نوجوان کرکٹنگ سینسیشن ویبھو سوریاونشی اور ان کے خاندان سے ملاقات کی۔ ان کی کرکٹ کی مہارت کی پوری ملک میں تعریف کی جا رہی ہے! ان کے مستقبل کے لیے میری نیک تمنائیں۔‘‘

واضح رہے کہ اس سے قبل اس ماہ کے شروع میں وزیر اعظم مودی نے بہار میں کھیلو انڈیا یوتھ گیمز کا افتتاح کرتے ہوئے سوریاونشی کی آئی پی ایل 2025 سیزن کی شاندار کارکردگی کی تعریف کی تھی۔ ساتھ ہی انھوں نے مشق کی اہمیت پر زور دیتے ہوئے کہا تھا کہ ’’جو زیادہ کھیلے گا وہ زیادہ چمکے گا‘‘۔

ویبھو سوریاونشی: ہندوستانی کرکٹ کا ابھرتا ہوا ستارہ

صرف 14 سال کے ویبھو نے انڈین پریمیئر لیگ (آئی پی ایل) میں سنچری لگانے والے سب سے کم عمر بلے باز بن چکے ہیں۔ راجستھان رائلز نے انھیں گزشتہ سال کی نیلامی میں 1.1 کروڑ روپے میں خریدا تھا۔ آئی پی ایل کے سات میچوں میں اس نوجوان نے 252 رنز بنائے ہیں جس میں ایک سنچری اور ایک نصف سنچری شامل ہے۔ ویبھو نے گجرات ٹائٹنز کے خلاف 35 گیندوں پر سنچری بنا کر سرخیوں میں جگہ بنائی تھی، جب انھوں نے یوسف پٹھان کا کسی ہندوستانی بلے باز کے ذریعے آئی پی ایل میں سب سے تیز سنچری کا ریکارڈ توڑ دیا۔

بھارت ایکسپریس اردو