PFI not get Relief From Supreme Court: سپریم کورٹ سے پاپولر فرنٹ آف انڈیا کو راحت نہیں ملی، مرکزی حکومت کی پابندی کے خلاف ہائی کورٹ جانے کی ہدایت

نئی دہلی: مرکزی حکومت کے ذریعہ یواے پی اے کے تحت عائد کی گئی پابندی کے خلاف پاپولرفرنٹ آف انڈیا (پی ایف آئی) کو سپریم کورٹ سے فی الحال راحت نہیں ملی ہے۔ سپریم کورٹ نے پی ایف آئی کی پابندی کے خلاف داخل عرضی خارج کردی ہے اورہائی کورٹ جانے کی ہدایت دی ہے۔ سپریم کورٹ نے پی ایف آئی سے کہا کہ ٹربیونل کے حکم کو پہلے ہائی کورٹ میں چیلنج دینا چاہئے تھا، لیکن آپ راست  طورپرسپریم کورٹ چلے آئے، اسی لئے آپ ہائی کورٹ جائیے۔ دراصل پی ایف آئی نے ٹریبیونل کے ذریعہ یو اے پی اے کے تحت پابندی برقراررکھنے کے فیصلے کو راست طورپرسپریم کورٹ میں چیلنج دیا تھا۔

دراصل، مرکزی حکومت نے پی ایف آئی کوغیرقانونی تنظیم قراردیتے ہوئے اس پر5 سال کی پابندی عائد کردی ہے۔ یواے پی اے کے تحت تشکیل ایک ٹریبیونل نے بھی پاپولرفرنٹ آف انڈیا (پی ایف آئی) کوغیرقانونی تنظیم اعلان کرنے والے مرکزی حکومت کے فیصلے کو صحیح ٹھہرایا تھا، جس کے بعد تنظیم نے اس فیصلے کو ہائی کورٹ لے جائے بغیرراست طورپرسپریم کورٹ میں چیلنج دیا تھا۔ اب سپریم کورٹ نے تنظیم سے سوال کیا کہ وہ ہائی کورٹ جائے بغیرراست طور پرسپریم کورٹ کیسے آگئے؟ واضح رہے کہ ملک میں فرقہ وارانہ نفرت پھیلانے کے الزام میں گزشتہ سال 27 ستمبرکو مرکزی حکومت نے پی ایف آئی پرپانچ سال کے لئے پابندی لگا دی تھی۔