Poison in Delhi’s Air: دہلی کی فضا میں گھلا زہر، آلودگی سے لوگ پریشان، کئی علاقوں میں اے کیو آئی 400 کے پار، 50 سے زائد مانیٹرنگ اسٹیشنوں پر 300 سے زیادہ

دہلی کی فضا میں آلودگی کا زہر کم ہونے کا نام نہیں لے رہا ہے۔ قومی راجدھانی میں مسلسل دسویں دن بھی فضائی آلودگی کا بحران برقرار ہے۔ اتوار (15 نومبر) کی صبح بھی دہلی کے کئی علاقوں میں فضائی معیار کا اشاریہ (اے کیو آئی) 400 سے تجاوز کرگیا۔ صبح سویرے گھروں سے باہر نکلنے والے لوگوں کو زہریلی ہوا کا سامنا کرنا پڑ رہا ہے۔ حالات ایسے ہیں کہ کئی علاقوں میں لوگوں کے لیے سانس لینا بھی دشوار ہوگیا ہے۔اتوار کی صبح 6 بج کر 5 منٹ پر دہلی کا اوسط اے کیو آئی 353 ریکارڈ کیا گیا۔ وہیں مرکزی آلودگی کنٹرول بورڈ (سی پی سی بی) کے مطابق آئی ٹی او میں اے کیو آئی 415 درج کیا گیا، جو انتہائی سنگین زمرے میں آتا ہے۔ اس کے علاوہ بھی کئی علاقوں میں ہوا کا معیار انتہائی خراب بنا ہوا ہے۔

دہلی میں گزشتہ دس دنوں سے آلودگی کی سطح مسلسل تشویش میں اضافہ کر رہی ہے۔ 5 نومبر کو قومی راجدھانی کا اے کیو آئی 369 تھا۔ اس کے بعد 6 نومبر کو 382، 7 نومبر کو 369، 8 نومبر کو 376 اور 9 نومبر کو 344 ریکارڈ کیا گیا۔10 نومبر کو اے کیو آئی کم ہوکر 299 پر پہنچ گیا تھا، جس سے لوگوں کو کچھ راحت ملنے کی امید پیدا ہوئی تھی۔ لیکن اگلے ہی دن آلودگی کی سطح دوبارہ بڑھنے لگی۔ 11 نومبر کو اے کیو آئی 313، 12 نومبر کو 350، 13 نومبر کو 373 اور 14 نومبر کو 367 ریکارڈ کیا گیا۔ اب 15 نومبر کی صبح بھی اوسط اے کیو آئی 353 درج کیا گیا ہے۔

#WATCH | Delhi: Air Quality Index (AQI) around AIIMS is 368, categorised as ‘Very Poor’, as per the CPCB (Central Pollution Control Board).

(Visuals shot at 07:30 am) https://t.co/UFpQgcc2tK

— ANI (@ANI) November 15, 2026

آئی آئی ٹی دہلی سمیت کئی علاقوں میں اے کیو آئی 400 کے پار

اتوار کی صبح دہلی کے کئی علاقوں میں آلودگی کی سطح انتہائی سنگین زمرے میں پہنچ گئی۔ آئی آئی ٹی دہلی میں سب سے زیادہ 426 اے کیو آئی ریکارڈ کیا گیا۔ اس کے علاوہ این آئی ایچ نریلا میں 417، آئی ٹی او میں 415، این ایس آئی ٹی دوارکا میں 407 اور این ایس یو ٹی جافرا پور میں 406 اے کیو آئی درج کیا گیا۔نارتھ کیمپس اور کامن ویلتھ اسپورٹس کمپلیکس میں اے کیو آئی 404 رہا، جب کہ پوسا میں 402 اور براری کراسنگ میں 401 ریکارڈ کیا گیا۔وہیں چاندنی چوک میں اے کیو آئی 386، جے این یو میں 385، وسندھرا انکلیو میں 380، باوانا میں 371، آنند وہار میں 365 اور روہنی میں 363 درج کیا گیا۔ اندرا گاندھی بین الاقوامی ہوائی اڈے کے ٹرمینل 3 پر اے کیو آئی 348 ریکارڈ کیا گیا۔

50 سے زائد مانیٹرنگ اسٹیشنوں پر اے کیو آئی 300 کے پار

قومی راجدھانی کے 50 سے زیادہ فضائی آلودگی مانیٹرنگ اسٹیشنوں پر اتوار کی صبح بھی اے کیو آئی 300 سے زیادہ درج کیا گیا۔ اس کا مطلب ہے کہ دہلی کے بیشتر علاقوں میں ہوا کا معیار انتہائی خراب ہے۔ فی الحال آلودگی سے راحت ملنے کے آثار نظر نہیں آرہے ہیں اور لوگوں کو زہریلی ہوا کے درمیان ہی اپنا دن گزارنا پڑ رہا ہے۔