PM Modi Pongal Celebration: وزیراعظم مودی کا نیا منتر: پونگل پر قوم کو بڑا پیغام، تہوار کو بتایا ’’گلوبل فیسٹیول‘‘

وزیراعظم نریندر مودی نے بدھ کے روز مرکزی وزیر ایل موروگن کی دہلی میں واقع رہائش گاہ پر منعقدہ پونگل 2026 کی تقریبات میں شرکت کی۔ روایتی لباس میں ملبوس وزیراعظم نے وہاں موجود لوگوں سے خطاب کرتے ہوئے ملک کے لیے ایک اہم وژن پیش کیا۔ انہوں نے کہا کہ ہمارا مقصد یہ ہونا چاہیے کہ ہماری تھالی بھی بھری رہے، ہماری جیب بھی مضبوط رہے اور ہماری دھرتی بھی محفوظ رہے۔ اس پیغام کے ذریعے وزیراعظم نے کسانوں کی محنت، خوراک کی خود کفالت اور ماحول کے تحفظ پر زور دیا۔

پونگل اب ایک ’’گلوبل فیسٹیول‘‘

وزیراعظم مودی نے کہا کہ پونگل اب صرف تمل ناڈو تک محدود نہیں رہا بلکہ یہ ایک عالمی تہوار بن چکا ہے۔ دنیا بھر میں جہاں جہاں تمل برادری موجود ہے، وہاں اس تہوار کو پورے جوش و خروش کے ساتھ منایا جاتا ہے۔ انہوں نے کہا کہ وہ خود تمل ثقافت سے محبت کرنے والوں میں شامل ہیں اور اس مقدس تہوار کو سب کے ساتھ منانا ان کے لیے باعثِ فخر ہے۔

تمل ثقافت: پورے بھارت کی مشترکہ وراثت

تمل ثقافت کی عظمت کا ذکر کرتے ہوئے وزیراعظم نے کہا کہ یہ دنیا کی قدیم ترین زندہ تہذیبوں میں سے ایک ہے اور پورے بھارت کی مشترکہ وراثت ہے۔ انہوں نے اپنے گزشتہ ایک سال کے تجربات کا حوالہ دیتے ہوئے ’’کاشی تمل سنگمم‘‘ اور رامیشورم میں پمبن برج کے افتتاح کے مواقع کو یاد کیا، جہاں انہوں نے تمل ثقافت کی توانائی کو قریب سے محسوس کیا۔ ان کے مطابق پونگل جیسے تہوار ’’ایک بھارت، شریشٹھ بھارت‘‘ کے جذبے کو مزید مضبوط کرتے ہیں۔

قوم کی تعمیر میں کسان اور مٹی کا کردار

وزیراعظم مودی نے اس بات پر زور دیا کہ فطرت کے تئیں شکرگزاری صرف الفاظ تک محدود نہیں ہونی چاہیے بلکہ ہماری روزمرہ زندگی اور طرزِ عمل میں بھی نظر آنی چاہیے۔ انہوں نے ’’امرت سروور‘‘، ’’مشن لائف‘‘ اور ’’ایک پیڑ ماں کے نام‘‘ جیسے اقدامات کا ذکر کرتے ہوئے پائیدار اور قدرتی کھیتی کی حمایت کی۔ وزیراعظم نے کہا کہ کسانوں کی محنت سے ہی آتم نربھر بھارت کو طاقت مل رہی ہے اور آنے والی نسلوں کے لیے مٹی کی صحت کو محفوظ رکھنا ہم سب کی مشترکہ ذمہ داری ہے۔

بھارت ایکسپریس اردو۔