PM Modi Vows Timely Review of India-Singapore Agreements: باہمی تجارت کی ترقی کے لیے ہندوستان-سنگاپور معاہدوں کا بروقت لیا جائے گا جائزہ‘‘: وزیر اعظم مودی

وزیر اعظم نریندر مودی نے جمعرات کو کہا ہے کہ بھارت اور سنگاپور کے درمیان باہمی جامع اقتصادی تعاون معاہدے (BCECA) کا بروقت مشترکہ جائزہ لیا جائے گا تاکہ دو طرفہ تجارت کو مزید تقویت دی جا سکے۔ سنگاپور کے وزیر اعظم لارنس وونگ کے ہمراہ ایک مشترکہ پریس کانفرنس سے خطاب کرتے ہوئے وزیر اعظم مودی نے کہا کہ سنگاپور کی جانب سے چنئی میں ایک نیشنل سینٹر آف ایکسیلینس برائے مہارت سازی کے قیام میں سرمایہ کاری سے اعلیٰ درجے کی صنعتی مہارت رکھنے والی افرادی قوت تیار کرنے میں مدد ملے گی۔

وزیر اعظم مودی نے مزید کہا کہ ’’ہم نے فیصلہ کیا ہے کہ بھارت-سنگاپور اقتصادی تعاون معاہدہ اور آسیان کے ساتھ ہمارا فری ٹریڈ ایگریمنٹ ایک مقررہ مدت میں دوبارہ جائزے کے لیے کھولا جائے گا۔ ہماری مختلف ریاستی حکومتیں بھی ان تعلقات میں کلیدی کردار ادا کریں گی۔‘‘ وزیر اعظم مودی نے بتایا کہ گجرات کی گفٹ سٹی بھارت اور سنگاپور کی اسٹاک مارکیٹوں کو جوڑنے میں ایک نیا پُل بن چکی ہے۔ انھوں نے مزید کہا کہ پچھلے سال سیمی کنڈکٹر ایکوسسٹم پارٹنرشپ ایگریمنٹ نے تحقیق و ترقی کے شعبے کو ایک نئی سمت دی ہے اور Semicon India Conference میں سنگاپور کی کمپنیوں کی بھرپور شرکت خاصی حوصلہ افزا رہی۔

وزیر اعظم نے سنگاپور کی کمپنی PSA International کے تعاون سے تیار کیے گئے انڈیا ممبئی کنٹینر ٹرمینل فیز 2 کے افتتاح کو بھی سراہا اور کہا کہ اس منصوبے سے بھارت کی کنٹینر ہینڈلنگ کی صلاحیت میں اضافہ ہوگا۔ انھوں نے بتایا کہ بھارت اور سنگاپور کے درمیان گرین اور ڈیجیٹل شپنگ کوریڈور کے معاہدے سے سبز ایندھن کی فراہمی اور ڈیجیٹل بندرگاہ کلئیرنس کے عمل کو تقویت ملے گی۔ وزیر اعظم مودی کے مطابق بھارت تیزی سے بندرگاہی بنیادی ڈھانچے کی ترقی پر کام کر رہا ہے اور سنگاپور کا تجربہ اس میں بے حد مفید ہے۔ وزیر اعظم مودی نے واضح کیا کہ ’’سنگاپور ہماری ایکٹ ایسٹ پالیسی کا ایک اہم ستون ہے۔ ہم آسیان کے ساتھ مل کر انڈو پیسیفک خطے میں امن و استحکام کے وژن کو آگے بڑھاتے رہیں گے۔‘‘

بھارت ایکسپریس اردو